SA sunod buwan na, gipaabot makabiyahe ang moderno ug airconditioned jeepneys subay sa duha ka bag-ong giablihan nga rota sa dakbayan sa Sugbo.
Si Ryan Benjamin Yu, chairman sa Cebu Integrated Transport Cooperative (Citrasco), nibutyag nga nisaad ang Chinese supplier nga i-deliver sa tungatunga nga bahin karong buwana ang unang 20 ka units sa jeepneys nga may Euro 4 nga mga makina.
Apan, wala kini matuman, hinungdan nga iyang susihon didto sa Manila.
Atol sa tigom niadtong Biyernes sa buhatan ni Cebu City Mayor Tomas Osmeña, gipahibawo ni Land Transportation Franchising and Regulatory Board (LTFRB) 7 Director Ahmed Cuizon ang mga representante sa mga business process outsourcing (BPO) sa duha ka missionary routes nga pagabuksan aron maoy subayon sa moderno nga mga jeepney nga padaganon sa Citrasco.
“Ganahan sila kay aircon, unya secondly ang pletihan... ganahan sila sa rates mas maayo na lang kuno kay sa mag-taxi,” asoy ni Cuizon sa mga reaksyon sa mga call center agent sa pagkasayod sa bag-ong kalamboan sa natad sa transportasyon nga moserbisyo sa mga rota nga dunay BPO companies.
Sumala ni Yu 40 ka jeepney units ang ilang gi-order, apan 20 lang una ang unang mahatod sa supplier karong buwana.
Matod niya, pasiunang tag 10 ka units una ang mobiyahe sa duha ka mga rota.
Ang unang rota manukad gikan sa Cebu City Hall, moagi sa Robinson’s Galleria dayon sa Cebu Business Park lahos sa I.T. Park.
Samtang, ang ikaduhang rota, gikan sa Paseo Arcenas sa Banawa, moagi sa may Court of Appeals lahos sa B. Rodriguez, unya sa Fuente Osmeña, dayon modiretso sa may Gorordo Avenue, moagi sa Ayala dayon uli padung sa Landers dayon lahos sa Sykes ug pabalik.
Si Yu nipasabot kini nga mga rota gipili kay mao kini ang mga dapit nga dunay presensiya sa mga kompaniya og BPO nga wala nay magbiyahian panahon sa kagabhion.
“To ensure also sa safety nila sa transportation,” dugang niini sa pakighinabi sa Superbalita Cebu kagahapon.
Si Cuizon nidugang nga gusto nila maseguro dunay mga jeepney nga 24 oras nga mobiyahe nga luwas alang sa mga call center agent nga nanarbaho og night shift.
“Unya mao man nay lisod kaayo nga makakuha sila og public transportation magabii labi na sa mga babaye nga call center agents kay mahadlok ba,” nagkanayon ang director.
Ang gisugyot nga pleti sa Citrasco kay P15 sa unang lima ka kilometros ug dugang P1 sa mosunod nga matag kilometro.
Ang nakamoderno sa mga ingon niini nga klase sa jeepney kay duna kini wifi connection, closed-circuit television (CCTV) camera, dash cam, global position system (GPS) ug automated fare collection system nga maggamit na og card. (SCG)