SUSAMA sa sumbingay sa bibliya sa buloyagon nga anak ang paghulagway ni Padre Oscar Banzon sa iyang pagbalik isip alagad sa Ginuo, human siya nitipas og laing dalan.
“Kahibawo ko welcome ko pirme. Pareho sa prodigal son sa bible ba kay mao man na gitudlo sa bible. We have to always accept katong gusto mobalik sa Ginuo,” paambit ni Banzon sa Superbalita Cebu dihang gipangayoan sa iyang habig sa pamahayag ni Cebu Archbishop Jose Palma nga andam siya dawaton sa artsidyosesis kon ugaling mobalik siya sa pagpangalagad isip usa ka pari.
Si Banzon gitambagan usab sa arsobispo nga pabiyaan ang babaye nga giingong nalambigit sa kinabuhi niini kon gusto siya maaktibo og balik sa pagkapari.
Si Banzon andam mobuhat niini.
“I am very willing to undergo the process. Tanan jud iyaha sa kalibotan akong biyaan in favor of that,” dugang niya.
Siya gisuspenso sa arsobispo dihang nidagan kini pagka kapitan sa Barangay Kawit, lungsod sa Medellin niadtong 2013. Siya nakadaog sa maong piniliay.
Apan atol sa barangay ug Sangguniang Kabataan elections niadtong Mayo 14, 2018, si Banzon naparot dihang nagpasubli kini sa maong pwesto.
Sa labaw nga 919 ka botos, gipildi ang pari ni Charito Arreglado, 53, usa ka miyembro sa St. Ignatius Centennial Choir.
Sumala ni Palma kon naglaraw si Banzon nga mobalik sa pagkapari, makigkita kini niya.
Ang arsobispo nipasabot nga kinahanglan moagi og taas nga proseso ug reorientation si Banzon sa dili pa kini hingpit mahibalik sa ministry sa pagkapari.
“It’s not just like, he ran today and he lose and then he comes back all he does is just push-up and he is up again. No no no. There is a process that he shall undergo. And we will determine after that,” pasabot ni Palma sa press conference niadtong Biyernes sa posibilidad nga dawaton og balik si Banzon nga nipadayag og kagustohan nga mobalik sa pagkapari human maparot sa bag-ohay lang nga piniliay sa barangay.
Si Banzon nitug-an nga andam siya makigkita ni Palma apan human na mahikay ang tanang mga dokumento sa iyang pag-turnover unya sa pagdumala sa Barangay Kawit ngadto kang Arreglado.
Si Msgr. Isidro Ullamot, episcopal vicar sa far-north district sa artsidyosesis, maoy gitahasan ni Palma atol sa ilang tigom sa Board of Consultors niadtong Miyerkules, nga ipaabot ngadto kang Banzon nga siya gusto makigkita niini. (SCG)