NASAKMIT ang P150 mil balor sa butane canisers gikan sa usa ka illegal seller atol sa buy-bust operation sa kapulisan ug mga ahente sa Department of Energy (DOE) niadtong Biyernes sa Sitio Manol sa Barangay Tisa, siyudad sa Sugbo.
Gisikop mao ang tag-iya sa maong negosyo nga si Mary Jane Ong Dechosa, 48, minyo, taga Tisa ug ang cashier nga si Roselle Rafols Muñoz, 29, taga lungsod sa Alcoy.
Sigon sa report sa kapulisan, nga nakadawat sila og taho gikan sa usa ka molupyo sa Tisa bahin sa magpapatigayon og illegal nga LPG butane cannisters.
Tungod niini, nilusad og usa ka buy-bust operation ang Criminal Investigation and Detection Group (CIDG) Cebu City nga gipangulohan ni PCI Chuck Barandog ug ang DOE 7 nga gipangulohan ni Atty. Mark Russ Gamallo.
Nasikop sa kapulisan silang Dechosa ug Muñoz samtang, nagduma kini sa negosyo.
Si Muñoz nagpakita sa business permit ug uban pang dokumento nga lehitimo ang negosyo apan, nasayran nga walay permit ang pagpamaligya og butane canisters nga gibasihan sa pagkasikop niini.
Lakip sa nasakmit ang 816 ka canisters nga walay sud, 5,762 ka butane canisters nga puno, LPG tank ug uban pa. (Kate F. Denolang ug Treshea De Pio STC-Interns)