SA kasaulogan sa Tuig sa mga batan-on sa 2019, gibanabanang 10,000 ngadto sa 15,000 ka mga delegado gikan sa nagkalainlaing bahin sa nasod ang gipaabot motambong sa dakong kalihokan nga pasiugdahan sa artsidyosesis sa Sugbo, ang National Youth Day.
Si Cebu Archbishop Jose Palma nibutyag nga gidawat nila ang pagpangulo sa kalihukan tungod kay adunay daghang ganahan moanhi sa Sugbo ilabi na kini nga kalihokan mahimong kabahin sa selebrasyon sa ika-500 ka tuig sukad sa pag-abot sa Kristiyanismo sa nasod nga nagsugod sa Sugbo.
“A lot of people are excited to go to Cebu... A lot of people come because of Sto. Niño as well as other devotions... If we think of next year’s National Youth Day, we can only thank the Lord that it is held in Cebu,” pahayag ni Palma atol sa press conference niadtong Biyernes.
Matod ni Padre Conegundo Garganta, ang executive secretary sa Episcopal Commission on Youth (ECY), gipili ang Sugbo nga maoy mo-host sa NYD gumikan sa presensiya sa maabtikon ug madasigon nga ministry sa kabatan-onan.
Sumala ni Padre Mark Rommel Barneso, secretary general sa pagpangandam sa NYD 2019, nga dili mominos sa P20 milyones ang kinahanglanon nga pundo alang sa lima ka adlaw nga kalihokan nga sugdan sa Abril 23 sa dakbayan sa Sugbo.
Niini, manginahanglan og pinansiyal nga ayuda ang artsidyosesis gikan sa publiko alang sa pagpahigayon sa kalihokan.
Apan matod ni Palma, gi-discourage nila ang pagpangayo og hinabang gikan sa mga pulitiko ilabi na sa sunod tuig himuon na ang mid-term elections.
Siya nidugang kon ang mga kandidato na mismo ang moduol nga dili sagulan og pamulitika, andam nila kini dawaton.
Si Barneso nidugang nga mangita usab sila og foster families uban sa tabang sa mga parokya sa Sugbo nga maoy mosagop sa mga delegado nga manambong sa NYD.
Matag delegado, nagpanuigon og 13 ngadto sa 39 anyos, mobayad og P1,500 nga registration fee nga naglakip sa kit, tambal, handouts, ug insurance.
Si Stephen Borja, secretariat sa ECY, nagkanayon niadtong 1986, gideklarar sa Catholic Bishops Conference of the Philippines (CBCP) ang Disyembre 16 sa matag kalendaryo sa simbahang Katoliko isip selebrasyon sa NYD human sa pagkaumol sa ECY.
“A special way of the church telling that the church loves young people, that the young people are important to the church. That they are not only the future but we must engage them, celebrate them in the present,” dugang niya.
Si Borja nidugang ang NYD gisugdan og pahigayon sa diyosesis sa Malolos, Bulacan ni Bishop Rolando Triona niadtong 1998; dayon sa artsidyosesis sa Manila niadtong 1999, 2000 sa Balanga, Batangas; 2001 sa Lipa, Batangas; 2002 sa Palo, Leyte; ug sukad niini gihimo na kini sa matag duha o tulo ka tuig, 2004 sa Bacolod; 2006 sa Davao; 2011 sa Manila; 2015 sa Tuguegarao; 2017 sa diyosesis sa Zamboanga ug sa 2019 sa artsidyosesis sa Sugbo.
Ang pagtutok sa kalihokan sa kabatan-onan sa simbahang Romano Katoliko nahimong regular nga tulumanon sa simbahan Romano sa tibuok kalibotan sukad sa panahon ni anhing Papa ug karon si St. Pope John Paul II. (SCG ug Carla Jane Calotes, CNU Comm Intern)