Dear Papa Joe,
Ako diay si Kylie, 16 years old, taga Cebu City. Bag-o lang ko naka-graduate og junior high school sa usa ka public school. Ang akong problema mahitungod sa akong boyfriend nga schoolmate ra pod nako.
Unang kita pa lang nako niya, sobra na nako siya ka crush. Gwapo man gud kaayo siya, kiligon kaayo ko kon makita ko siya, pero wala gyud ni mo attempt og panguyab nako maong ako nalang ang ni una. Akoy ni first move, pinaagi sa pag private message niya sa facebook. Ni reply sad ang boy hangtud nga nagkauyab na ming duha sa Facebook lang.
Sweet kaayo siya ug mag I Love you pa siya nako sa chat. Pero kon magkita na gani mi sa school, maora gyud nig wala makaila nako. Dili ko niya tagdon bisag magkasugat pa mi. Wa gyud ko makasabot. Sakitan ko sa iyang style. Uyab ba mi sa Facebook lang? Kay inig ka gabii, kon mag chat mi, sweet na man sab kaayo nako. Please advise me what to do.
KYLLE
Dear Kylie,
Maayong adlaw nimo. Siguro mauwaw pa ang imong uyab kay bata pa man sab mo kaayo. Imagine, ikaw ang niuna og panguyab niya sa Facebook ug gisugot ra sab ka niya. Wa gani ta masayud og basig gisakyan lang ka sa maong lalake kay di man siya ang nanguyab nimo.
Kon ako pa nimo, focus sa imong pag-eskwela. Ayaw sa anang uyab-uyab kay bata pa kaayo ka. Pasagdi na lang tong lakiha kay wala pa siguro sa iyang huna-huna ang uyab-uyab maong dili siya motagad nimo sa personal. Move on nalang ug sa sunod, kon maibog og lalake, ayaw na pag una-una kay basin sakyan ka lang ug ikaw pay madaut. Paabota nga ang lalake ang unang manguyab nimo.
PAPA JOE
(sa inyong tampo ipadala lang sa papajoesuperb@gmail.com)