MAGSUGOD na karong adlawa ang usa ka semana nga Brigada Eskwela nga pasiugdahan sa Departamento sa Edukasyon. Paagi ni pagdasig sa ginikanan, magtutudlo ug ubang grupo sa paghugpong sa ilang mga kusog pag-andam sa mga publikong eskwelahan alang sa pagbukas sa klase karong Hunyo 4.
Nakadungog ko ug pangutana nganong magpasiugda pa man ug ingon niini nga kalihukan ang DepEd nga unta matag tuig ang nasudnong panudlanan nigahin naman ug pundo aron mamintinar magpabiling haum ang mga eskwelahan sa panginahanglan sa mga bata? Nganong hasol hasolon pa man ang mga ginikanan sa pagsalmot nga kulang pa man gani ang ilang oras pagpangita ug panguwarta aron masuportahan ang panginahanglan sa ilang anak sa pagbukas sa klase ?
Sa akong pagsabot di paigo ang minilyon nga budget kung isalig lang ang tanan sa gobyerno. Ang lain sab nakong hubad nga kining Brigada Eskwela gidesinyo pag-abli savhunahuna ug galamhan sa publiko nga sa tanang paningkamot ma publiko man o pribado nagkinahanglan ug kooperasyon ug pagsabot sa mga hingtungdan.
Paagi sab ni pagdasig natong mga ginikanan nga sa mosugot ta ug sa dili ang eskwelahan maoy ikaduhang pinuy-anan sa atong mga anak. Ug angayan lang nga manginlabot kita pagsiguro nga ang mga lim-aw nga naa sa kilid kilid malimpyohan aron di puy-an sa mga lamok nga makamatay. Ang tinubdan sa tubig mabutang sa siguro aron nga kanunay’ng limpyo ug di manimaho ang mga pansayan.
Siguro sa Brigada Eskwela, makaapil ta pagsugyot nga mabutangan ug foot path ang mga agianan padung sa classroom kay dangog panahon sa ting-ulan basin di luwas nga agian. Sa ato pa sa Brigada Eskwela di lang kakulang sa mga lingkoranan ang angay tutukan. Moapil ta pagtuki sa ubang butang nga sa atong pagtoo makaayo di lang sa mga bata apil na sa ilang mga magtutudlo. Ug labaw ko nga nagtoo nga ang Brigada Eskwela di lang ning semanaha.
Himuon ni tibuok tuig ug angay na gyud untang pundohan ug sakto bahala na kung ang mga ginikanan basi sa ilang katakus maoy mopatuman.
TRAPIK
Gusto kong molili unsay plano sa mga tinugyanan sa trapiko pahaum sa pagbukas sa klase sunod semana. Ang mga eskwelahan pribado man o publiko angay nga manginlabot. Balik ba gihapon ta sa naandan nga ang mga bata sa gate ra gihapon pakanaugon niadtong mga ginikanan nga nagmotor o nagdala ug sakyanan? O, ablihan nato ang mga gate aron adto na sila sa sulod pakanaugon? Sa ingon niini nga paagi di mahasol ang ubang sakyanan nga nag gamit sa karsada. Di ba tinuod nga kung naay eskwelahan sa usa ka dapit kaluhaan kini ug problema sa trapiko kay ang atubangan sa gate magtapok ang daghang sakyanan.
Kadtong di pa kaabot sa gate mokawat ug usa ka lane resulta monipis ang daan nang apiki nga karsada. Naay mga eskwelahan nga dunay lapad kaayo nga lote sa likod sa mga building. Kung padiretsohon didto ang mga sakyanan aron adto didto pakanaugon ang ilang mga anak, hamugaway kaayo ang atubangan nga karsada ug di mabalda ang bul-og sa trapiko. Unahon daw nato pag-eksperimento ang Labangon Elementary School.