KON ikaw usa ka magbabalaod, nasayud ka nga ang imong balaod nga ipasa sa hawanan sa kongresso, balaod nga kapahimuslan sa tanan ug dili para sa imong kaugalingong interest.
Si Congressman Prospero Castillo Nograles mao ang pinakauna sa kasaysayan nga nahimong Speaker sa Kongreso nga gikan sa Davao, pero wala kay madungog nga mga isyu gikan sa mga oposisyon, o gikan sa mga yanong longsuranon.
Dunay politikanhong pinulongan nga nag-ingon, “Ang politika addition, dili subtraction.” Gawas nga daan nang kaaway sa politika sila si Congressman Boy Nograles ug si Mayor Rody Duterte, pero wala mangita og kaaway sa politika si Speaker Nograles sa dihang anaa pa siya sa maong posisyon.
Pero sukwahi ang nahitabo karong panahona, inay nga ikapasigarbo nato kay aduna kitay ikaduhang Speaker nga gikan gihapon sa Mindanao, pero iyang gikalaban ang mga politiko nga maoy mitabang kaniya aron nga mahimo siyang Cogressman nga sa milabay nga panahon nga sige og dagan apan sigeng kapusoy.
Ang sakit pa gayud kay ang mga politiko nga kauban niya sa probinsiya maoy iyang gikontra nga responsable sa kalambuan sa pobreng lalawigan kanhi, ug karon nahimong nagmalambuon gikan sa mga Del Rosario gikan sa dekada 80 hangtud karong panahona.
Daghang problema nga giatubang ang atong nasud nga nagkinahanglan og hinanaling solusyon gikan sa atong mga magbabalaod, una niini, sa minimum wage nga komon nga poblema atong mga mamumuo nga unta ang mga magbabalaod gilauman nga makasulbad.
Pero unsay giuna ni Speaker Pantaleon Alvarez? Ang dissolution of marraige nga dili kaayo kinahanglanon sa komon nga tawo, kini tungod kay siya man ang unang makabinipisyo.
Kong wala sawaya sa atong Presidente Rodrigo Duterte, seguro wala ipadaplin ang maong balaodnon.
Suwerte kitang taga Mindanao nga naka-Presidente og taga Davao, apan malas nga naka-speaker kita og kulang sa Kabangka-agan, nga nahubog sa hinulaman nga gahum nga gihatag kaniya sa Presidente.
Pero ang balita nga atong nahipus, human tangtanga si Senate President Aquilino Pimentel, isunod kuno pagtangtang ang Speaker sa Kongreso. Dali ra man na, usa lang ka hunghong sa Presidente sa mga kongresista, sa usa lang ka pamilok mawala na ang Speaker.
Sumala sa atong nahibaw-an, wala kuno hatagi sa Speaker og budget ang ikaduhang distrito sa probinsiya sa Davao del Norte nga gilingkuran ni Congressman Antonio “Tonyboy” Floirendo. Ngano? Tungod ba kay nag-away sila sa way bili ang hinungdan?
Bisan unsa man ka personal ang ilang giawayan, dili iapil ang serbisyo tungod kay dili si Speaker Alavarez ang tag-iya sa pundong salapi para sa proyekto sa mga katawhan sa segundo distrito.
Mr. speaker, katawhan ang imong kalaban, unsaon pagdaug sa imong iparang nga kandidato batok sa mga Floirendo nga katawhan man ang imong gikalaban? Matud pa sa kasaligang tinubdan sa balita nga atong nahipus, karong 2019 national and local election, Del Rosario ang imong makaatbang. Kinsa kaha? Amahan, o anak? Atangi kining kulba-hinam nga pamolitika sa Davao del Norte sa sunod tuig.