Editoryal: Ayuda sa mamumuo?

MAHITABO kaha ang giingon sa Department of Labor and Employment (Dole) nga maghatag ang gobyerno og ayuda sa mga mamumuo kon di irekomenda sa Regional Tripartite Wages Board nga dunay dugang usbaw sa sweldo?

Sa pakighinabi ni Labor Sec. Silvestre Bello III, siya nagbutyag nga padayon ang pagtuon sa Dole sa maong plano, human wa gipaboran ni Finance Sec. Carlos Dominguez III ang P500 kada buwan unta nga ayuda sa mga mamumuo.

Ila kining gihimo isip tubag sa hangyo sa mga labor groups nga umento sa sweldo mao nga gitahasan ni Bello ang wages board nga tun-an ang posibilidad nga mahatagan og katumanan ang hangyo sa mga mamumuo.

Gawas niini, gisultihan sab sa kalihim ang board nga susihon ang epekto sa tax reform law nga gitudlo nga hinungdan sa pagsaka sa presyo sa palaliton.

Bitaw, angay gayud kining susihon sa gobyerno tungod kay bisan kinsa nga yanong mamumuo, makaingon gayud nga di makasapar ang sweldo sa naglumba og saka nga presyo.

Reklamo sa mga ginang sa panilamay, naglisud na sila pagpaigo sa diyutay nga kinitaan sa ilang pamilya alang sa inadlaw nga panginahanglan.

Usa sa mga gihimong sumbanan mao ang presyo sa karneng baka nga tag P280 ang matag kilo ug bugas nga kapin P50 ang matag kilo sa merkado.

Kon mao kini ang presyo sa merkado, unsaon man pagbadyet ang P340 nga minimum nga sweldo? Bisan di kita mosugot niini, apan di sab nato mabasol ang gagmay nga negusyante nga kanunay mosulti nga mahal na ilang presyo kay lagi apektado sa Train law.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph