MATALAM, North Cotabato -- Midepensa karon nga wala nila gimasaker ang siyam ka tawo nga napatay sa anti-drug operation alas 11:15 sa gabii niadtong Biyernes hangtud alas 2:00 sa kadlawon sa Sabado sa Sitio Biao Barangay Kilada.
Kini mismo ang gibutyag ni Matalam Cotabato chief of police Chief Inspector Sonny Leonsito.
Giklaro sa opisyal nga pasulod pa lang ang hiniusang puwersa sa kapulisan ug 7th Infantry Battalion sa Philippine Army sa drug den nga gipangulohan nila Dadting Kasan ug Intan Aban girakrakan na sila sa mga armadong lalaki gamit ang tag-as nga matang sa armas.
Napugos ang raiding team sa pagbalos sa pagpabuto sa ilang mga hinagiban batok sa mga namusil kanila.
Milungtad sa usa ka oras ang sinukliay og mga bala sa mga pulis ug sundalo batok sa mga suspek nga maoy hinungdan sa pagkakugang sa mga sibilyan.
Sa diha nga nahunong ang pinusilay, siyam sa mga armadong lalaki ang napatay ug duha ang naangol.
Una nga giila ni Police Supt. Bernard Tayong ang tigpamaba sa Cotabato Police Provincial Office ang mga nakabsan sa kinabuhi nga sila Terereng Salping, Burad Salping, Dadting Kasan, usa ka alyas Orong, Intan "Puti" Aban, Mauntapo Aban ug laing tulo nga wala pa mailhan ang bansagon.
Ang operasyon base sa sa search warrant nga gipaguwa ni RTC 12 Branch 16 Judge Alandrex Betoya batok nila Dadting Kasan ug Intan Aban gumikan sa paglapas sa Republic Act 9165 o Comprehensive Dangerous Drug Act of 2002.
Giangkon sab ni Leonsito nga dugay na nila nga gipanid-an ang maong drug den bisan mga sibilyan mahadlok nga musulod sa maong dapit sa kabalaka nga maalaan nga mopalit og gidiling druga.
Nakuha sa mga pulis ug sundalo sa duha ka balay nga gitaguan sa mga suspek ang mga tag-as nga matang sa armas, shabu ug mga bala.
Apan ang pamilya sa mga nangamatay nag-ingon nga wala nalambigit sa illegal drug trade ang mga napatay uban nila mga ordinaryong mag-uuma.
Giingon nga kadtong dunay mga armas sakop sa 105th Base Command sa Moro Islamic Liberation Front apan gisusi pa kini sa mga awtoridad. (Edgar E. Fuerzas)