2 NPA gipakasal sa Army

NEW BATAAN, Compostela Valley -- Usa ka parisan ang gikasal sud sa kampo sa 66th Infantry Battalion (IB) nga kanhi mga sakop sa rebeldeng New People's Army (NPA) nga mitahan sa kasundalohan.

Sumala ni 10th Infantry Division Spokesperson Capt. Jerry Lamosao nga kini ang labing unang higayon ug usa ka taglagsaon nga hitabo sa kampo sa militar diin gikasal ang kanhi mga miyembro sa NPA.

"Unang higayon ni siya, talagsaon ra kaayo, ug paningkamotan nato nga masubli pa kini sa ubang parisan kinsa misurender ug mibalik sa sabakan sa balaod," ingon ni Lamosao.

Giingon ni Lamosao nga usa ka lehitimo ang maong kasal sanglit mismong si Mayor Geraldford Balbin ang nagpahigayon sa seremonya ngadto sa bag-ong magtiayon.

Wala na gipanganlan sa opisyal ang mag-asawa alang sa ilang proteksyon diin miingon sab si Lamosao nga dunay mga gihuptan nga katungdanan sa nasangpit nga grupo ang duruha.

Ang maong kasal naatol sa ika-20 nga anibersaryo sa 66th IB nga gipangunahan ni Ltc. Palmer Parungao.

"Usa sab ni siya sa mga pamaagi nga makita sa ilang mga kaubanan niadto sa bukid nga kita sa gobyerno, tawhanon atong pagtratar sa mga NPA human sa ilang mga pag-surender," dugang sa opisyal.