SUGOD karong adlawa, sa rehiyonal nga buhatan na sa Land Transportation Franchising and Regulatory Board (LTFRB) 7 sa North Reclamation Area, siyudad sa Sugbo, himuon ang calibration, testing ug sealing sa mga metro sa taxi.
Si LTFRB 7 Director Ahmed Cuizon nibutyag nga mibalhin na sila sa ilang buhatan gikan sa dakong hawan sa South Road Properties, ning dakbayan, kay dili na kaayo daghan ang mga taxi nga ilang ipaubos sa calibration, testing ug sealing.
Matod niya, gikan sa 6,000 ka taxi units, dul-an na sa 5,200 ang ilang na-calibrate sukad niadtong Pebrero ning tuiga.
“So, niundang na ta og calibration didto sa SRP kay dili naman kaayo daghan ang mangadto nga mga taxi drivers. So, diri na lang ta sa opisina,” pahibawo sa director sa pakighinabi sa Superbalita Cebu.
Ang ilang buhatan abli gikan sa alas 8 sa buntag hangtod sa alas 5 sa hapon, Lunes hangtod sa Biyernes.
Sa kasamtangan, ang mga taxi unit kansang mga plate number nagtapos sa 1 ug 6 ang gi-calibrate na sa mga tinugyanan sa LTFRB 7 hangtod sa Hunyo 4, 2018.
Si Cuizon nipasidaan ang mga taxi driver ug operators nga molapas sa gitakda nga mga petsa ang pamultahon og P200 matag adlaw.
Samtang, sa Hunyo 8, gitakda ni Cuizon ang calibration, testing ug sealing sa 50 ka taxi units sa Tagbilaran, Bohol.
Ang director niasoy nga didto na sila sa Tagbilaran sa miaging semana alang sa calibration sa mga taxi apan, ang uban niini kay dili pa kumpleto sa gikinahanglan nga rekisitos.
Kini sama sa pagbutang og closed-circuit television (CCTV) camera, dashboard camera, global position system (GPS) ug libre nga wi-fi.
“By that they should already be complied with all the requirements so that they can proceed with the calibration and resealing,” dugang ni Cuizon.
Siya daan nang nipasidaan nga dili nila i-calibrate ang mga taxi nga kuwang sa mga rekisitos bisan og usa lang.
Kon dili mapaubos sa calibration, testing ug sealing ang metrohan sa taxi, dili kini tugotan nga makasingil sa gipausbawan nga pletihan, P40 nga permanente nga flag down rate, P13.50 sa matag kilometro, ug P2 matag minuto nga waiting time. (SCG)