Gawas sa paghinlo ug pagpanindot sa mga lawak saringan, ang paghimo sa 126 ka publikong mga tunghaan sa dakbayan sa Sugbo nga andam batok sa katalagman ang gitutokan sa Cebu City Division sa Department of Education sa pagpahigayon sa Brigada Eskwela karong tuiga.
Karong buntag, ilusad sa DepEd ang Brigada Eskwela diin dinhi sa siyudad sa Sugbo mahitabo kini sa Labangon Elementary School.
Ang kalihokan molungtad hangtod sa Hunyo 2, uban sa tema nga “Pagkakaisa Para sa Handa, Ligtas at Matatag na Paaralan Tungo sa Magandang Kinabukasan.”
Si Cebu City Assistant Schools Division Superintendent Danilo Gudelosao niingon nga gusto nila hingusgan ang kaamgohan sa kabataan, mga ginikanan ug komunidad sa pagpangandam batok sa katalagman labi na sa mga tunghaan nga nahimutang sa bukid nga kuyaw sa pagdahili sa yuta sama sa mga Barangay Busay, Sirao ug Sapangdaku.
Matod niya, karong tuiga, ang mga tinun-an sa elementarya sa Busay magpabilin sa ilang temporaryo nga mga classroom sa Busay National High School.
Si Cebu City Councilor Joy Augustus Young nibutyag nga tulo ka andana nga tunghaan nga magkantidad og P10 milyones ang gilauman nga pabarugon sa sunod tuig alang sa mga estudyante sa elementarya.
Laing bantayanan sa division ang mga tinun-an sa Sapangdaku Elementary School nga ibalik ang ilang klase sa orihinal nga eskwelahan nga duol sa sapa.
Niini, ilang nakita ang kamahinungdanon nga angay masayod ang mga bata, ginikanan ug komunidad kon unsay angayang buhaton aron maminosan ang kadaut nga manugna kon dunay motumaw nga kalamidad.
“Ang among agreement diha basta kusog gani kaayo ang ulan unya baga ang dag-om, ang mga bata dili na lang gyud sila paeskwelahon, labi na atong motabok og sapa,” sumala ni Gudelosao sa pakighinabi sa Superbalita Cebu kagahapon.
Ang disaster-preparedness ang ilang giapil sa pagplano atol sa tigom sa mga disaster risk reduction management (DRRM) coordinators sa matag eskwelahan.
Si Gudelosao namahayag nga ang Brigada Eskwela nagtinguha nga makuha ang suporta sa lainlaing mga ahensiya sa gobiyerno ug komunidad gawas sa mga ginikanan ug kabataan sa pagpanglimpyo ug pag-ayum-ayom sa mga publikong tunghaan.
Tinguha nila sa pag-abli sa klase sa Hunyo 4, magsugod na ang klase ug andam na ang mga magtutudlo diin wala nay manglimpyo.
Samtang, si Amaryllis Villarmia, information officer sa DepEd 7, niklaro nga dawaton gihapon sa enrollment ang mga bata bisan kon dili makatabang ang ilang mga ginikanan sa Brigada Eskwela.
Gipaabot nga kapin sa 178 mil ka mga estudyante gikan sa kindergarten hangtod sa senior high school sa mga estudyante sa publikong mga tunghaan sa siyudad ang mosud sa unang klase sa sunod Lunes.
Si Gudelosao nidugang nga mo-average og 2 porsyento ang pagsaka sa gidaghanon sa mga tinun-an matag tuig diin sa miaging school year nakatala sila og 175, 267 ka estudyante nga na-enroll.
Sa ihap, 15,879 ang na-enroll sa kindergarten; 95,941 sa elementarya; 662 sa special education; 32,477 sa mga junior high school (adlawan); 21,270 junior high school (gabii) ug 9,038 sa mga senior high school sa mga publikong eskwelahan. (SCG)