SECTIONS
Thursday , June 21, 2018
SUPERBALITA CEBU

96-anyos babaye patay sa sunog

PATAY ang usa ka 96- anyos nga ginang sa sunog nga nahitabo sa dan Burgos, Barangay Poblacion, lungsod sa Daanbantayan kagahapon sa buntag.

Laing duha ka mga insidente sa sunog ang girespondihan sa siyudad sa Danao ug lungsod sa Argao niadtong Sabado.

Sa Daanbantayan, ang namatay mao si Marcelina Carbonquillo, kinsa natanggong sud sa nasunog nga bungalow.

Ang apo sa namatay nakagawas sa balay dihang niulbo ang kayo pasado alas 8 sa buntag.

Ang mga silingan ug kabanay nisuway og luwas ni Carbonquillo apan napakyas sila pagguba sa padlock sa gate, sumala sa report sa sibyaanang dyAB.

Sa pasiuna nga imbestigasyon nagpakita nga ang kayo nagsugod sa lawak ni Carbonquillo.

Sumala ni SFO1 Eugenio Conde, fire investigator, posible ang na-overheat nga electric fan ang hinungdan sa sunog.

Alas 8:50 sa buntag, dihang nakadawat ang fire station og tawag gikan sa disaster team sa Daanbantayan Municipal Government sa sunog sa dan Burgos.

Ang disaster team gikan nirespondi og alarma sa grass fire dihang nasunog ang balay ni Carbonquillo alas 8:45 sa buntag ug nakontrolar ang kayo human sa paglabay sa 10 minutos. (SCG, KAL sa SunStar Cebu)


VIEW COMMENTS