GIPUSIL-PATAY si Buenavista, Bohol Mayor Ronald Lowell Tirol sud sa iyang gipanag-iya nga buwangan sa Barangay Asinan, alas 3:00 sa hapon kagahapon.
Ang 37-anyos nga mayor naigo sa iyang ulo sa duha ka bala sa wala pa matino nga kalibre sa armas, matod ni Chief Insp. Rully Lauron, hepe sa kapulisan sa Buenavista.
Si Tirol diha naglingkod sa upper box sa arena dihang duha ka mga lalake ang ningduol kaniya ug usa niini ang nipusil sa mayor sa makadaghang higayon nga duol kaayo, sumala sa mga saksi.
Tulo ka mga lalake nga nagtaptap sa nawong ang nakita nga nagmotorsiklo ug usa niini ang nipusil sa mayor.
“Dili gyod to sila taga Buenavista. Walay nakaila sa witnesses,” dugang ni Lauron.
Daling gidala ang biktima sa publikong ospital sa lungsod sa Inabanga, apan gideklarar nga dead-on-arrival sa nag-atiman nga doktor.
Si Lauron, sa pakighinabi sa SunStar Cebu, niingon nga si Tirol giubanan sa duha ka mga guwardiya apan gisugo sa mayor busa nanglakaw.
“Wala na siya (guwardiya) kabalos kay layo ra siya,” matod ni Lauron.
Dugang niya nga si Tirol gisuwayan na og patay niadtong 2014 sa buwangan sa Clarin apan nakalingkawas ug daghang hulga sa iyang kinabuhi sukad niadto.
“Naay tawag, naa poy texts lang. Naa poy gipaagi lang sa kaila ang threat,” matod ni Lauron, kinsa nahimong hepe sa Buenavista sa miaging buwan pa lang.
Nanawagan siya sa mga higala ug kabanay sa mayor sa pagbutyag sa detalye sa hulga sa kinabuhi sa mayor alang sa kasulbaran sa kaso.
Dugang ni Lauron, walay taho nga si Tirol nalambigit sa illegal nga drugas ug wala sa listahan sa kapulisan.
Ang buwangan, walay guwardiya, dunay permiso sa operasyon.
Matod ni Lauron, gisusi nila ang tanang anggulo sa motibo sa pagpatay sama sa pulitika ug personal nga kalagot.
Si Bohol Provincial Police Office Director Angeles Geñorga nimando ni Lauron sa pagpangita sa mga mamumuno.
Ang duha ka armadong lalake nagsakay og motorsiklo nga gimaniho sa laing lalake. Ang tulo nagpadagan sa motorsiklo padulong sa silingang lungsod sa Calape.
Sumala ni Lauron, nakuha sa imbestigador ang upat ka kabhang sa bala sa .45 pistol.
Si Bohol Gov. Edgar M. Chatto nimando sa Philippine National Police (PNP) sa Camp Dagohoy sa paghimo og manhunt operations.
Si Chatto niingon nga unang gipahibalo human sa pagpamusil nga si Tirol gidala sa Inabanga District Hospital sa silingang lungsod.
“We are calling for the people of Bohol to pray for Mayor Tirol and we extend our condolences to the family and the people of Buenavista. We should remain calm amidst this tragedy and let the authorities do the manhunt and investigation,” matod ni Chatto.
Si Tirol nag-alagad sa Buenavista gikan sa amahan sa biktima, Leandro nga nakatapos og tulo ka termino isip mayor apan namatay na kini tungod sa sakit.
“So, we can say that the Tirols had political hold in Buenavista town,” matod ni Chatto.
“I instructed the police to track the record of the previous incident to find out if it was related to yesterday killing of the mayor,”matod ni Chatto.
Niadtong 2016, si Tirol nidagan sa ikaduhang termino ubos sa United Nationalist Alliance (UNA). (GPL, SCG, SunStar Cebu)