SECTIONS
Tuesday , June 19, 2018
SUPERBALITA CAGAYAN DE ORO

9 anyos gikunsumo sa 72 anyos nga amahan

CAGAYAN DE ORO. Tingkagol sa bilanggoan ang usa ka 72 anyos human giingong gilugos ang duha ka mga anak. (KCS/Superbalita Cagayan de Oro)

GIKUNSUMO sa usa ka amahan ang iyang 9 anyos nga anak diin ang ulahing pagpanglugos niadtong Hunyo 2, 2018 mga alas 7:00 sa gabii diha sa Balacanas, Barangay Consolacion, dakbayan sa Cagayan de Oro.

Gibalhog sa prisohan ni Eduardo (bansagon gitago), 72, residente sa nahisgutang dapit human giakusahan pagpanglugos sa iyang Grade 3 nga anak.

Nitumaw usab nga lakip nga gilugos ang 8 anyos nga anak niini basi sa pamahayag sa 9 anyos.

Sa nahipos nga impormasiyon gikan sa Police Station 5 (PS5) sa Macabalan gikabutyag nga nidangop sa kapolisan ang mga Barangay Health Worker (BWH) uban ang biktima ug gibutyag ang nahitabong pagpangabuso sa ilang amahan sa pipila na ka mga higayon.

Giingong niadtong Hunyo 2 nahidangat sa ilang panimalay ang amahan mga alas 7:00 sa gabii nga hubog.

Paingon na sa pagkatulog ang biktima apan gikasab-an kini sa suspek sa wala’y igong rason ug gihapak og kutsilyo hinungdan nga nakaangkon kini og samad sa iyang wala nga bahin nga tiil.

Dali usab nga gihubo-an sa short pants sa suspek ang biktima apan nasapon kini sa iyang asawa ug gani gisukmatan pa kini sa pag-ingon ”Unsa man na imong gibuhat sa imong anak? Imo man nang kaugalingon nga anak” hinungdan nga dali nga gisul-ob pagbalik sa bata ang iyang sapot ug natulog.

Apan giingong sa dihang nigawas ang asawa kay adunay gipalit gibalikan matud sa suspek ang bata ug malampusong gihimo ang pagpanglugos.

Nagbahad kini sa bata nga bunalan kung kini mosumbong.

Gidugang pa usab sa tinigyunan sa BHW kinsa naghatod sa bata nga mismong nadungog nila ang gibutyag sa bata nga gihilabtan kini sa amahan ug dili lamang kausa apan ka napulo.

Sa pakighinabi sa Sun.Star Superbalita kang P/Chief Inspector Enrique Belaca-ol, hepe sa Police Station 5 (PS5) sa Macabalan, gibutyag niini nga ipasaka na nila ang kasong pagpanglugos batok sa suspek.

“Kaning bata, 9 years old allegedly gi-rape daw ni sa iyahang amahan, upon discovery, upon report sa incident, gi asistahan sa mga CSWD nag-conduct dayon tag follow-up operation pagdakop sa suspek,” pahayag ni PCI Belaca-ol.

Dili na mobarog

Samtang sa bahin sa suspek gipanghimakak niini ang alegasiyon gumikan kay una tiguwang na matud kini ug dili na mobarog ang iyang kinatawo ug bata pa usab ang iyang asawa.

Nasayran nga 28 anyos pa ang asawa niining suspetsado nga nag-edad og 72 anyos, kinsa usa ka sikad driver.

Sa pakighinabi sa Sun.Star Superbalita ngadto na sa suspek hugot niini nga gipanghimakak ang alegasiyon ug gani andam kining magpakamatay aron nga pamatud-an nga wala niya kini gihimo.

“Ang tinuod lang bahalag unsa pa, bahalag patyon ko karon, dili ko mamakak ang tinuod lang kung duna pay hilo imnon ko gyud, magpakamatay ko,” pahayag sa suspek.

Gidugang pa usab niini nga naningkamot na lamang kini alang sa iyang mga anak ug dili na mahimo ang maong alegasiyon.

“Nganong magkuan man ko nga akong asawa bata pa, ikaduha pud may edad nako, di na gani mobarog ang akoa, 72 nako ang ako nalang panginabuhi nga makakaon ang akong mga anak, naningkamot ko," dugang pa niini.

Samtang gibutyag usab niini nga lain ang nanghilabot sa iyang anak gani aduna kini gipanganlan nga maoy nanamastamas sa iyang anak.

Karong mga panahona padayon pa ang imbestigasiyon aron masuta usab ang kamatuoran nga lakip ang 8 anyos niini nga anak ang iyang gihilabtan.


VIEW COMMENTS