SECTIONS
Sunday , June 24, 2018
SUPERBALITA CAGAYAN DE ORO

Mga bakwit magdugay pa sa Kapitolyo

MISAMIS ORIENTAL. Ubay-ubay ka pamilya gikan sa Barangay Banglay, Lagonglong, Misamis Oriental ang nanghikling didto sa Kapitolyo Probinsyal niadtong Marso 2017 tungod matud pa sa pagpanagana human anaa ang presensya sa kasundalohan sa ilang dapit. Nanghikling pag-usab ang mga residente sa Sitio Kamansi sa Barangay Banglay human sa giyera tali sundalo ug mga New People's Army (NPA) niadtong Mayo 26. (Superbalita Cagayan de Oro FB)

"WALAY nahitabo sa among pagdayalogo."

Kini ang pahayag ni Sariza Acosta, tigpamaba sa mga Lumad nga Higaunong bakwit gikan sa Sitio Kamansi, Barangay Banglay, lungsod sa Lagonglong, Misamis Oriental.

Sila ang apektado sa giyera tali sundalo ug mga New People's Army (NPA) niadtong Mayo 26, 2018 diin duha ka membro sa walhong grupo ang patay sa binakbakay.

Gipasabot niini sa SunStar Superbalita nga walay nahitabo nga pagkasinabot sa ilang pagdayalogo tali sa mga sundalo niadtong Biyernes, Hunyo 8.

"Wala gyod nahitabo sa among pagdayalogo kay nag ingon man ang mga sundalo nga magkampo gyod sila didto sa Kamansi og magpabilin sila didto hangtod two years," matud ni Acosta.

Butang nga dili gyod nila matugotan gumikan kay daan na nila gisulti nga dili sila mamalik sa ilang lugar hangtod magpabilin ug magkampo sa ilang dapit ang mga sundalo.

Sa pangutana kon posible ba nga magdugay pa sila sa pagpasilong sa kapitolyo.

Walay gidapigan

Giklaro sab ni Acosta nga wala silay gidapigan ug labaw sa tanan wala nila suportahi ang NPA.

"Among gusto nga mahitabo ang mga sundalo dili magkampo sa among lugar kay amo nang gaampoan ang among mga tinikad isip lumad. Dili na pwede sa amoa ang gadala dala og mga armas. Sa mga NPA pod dili namo sila gatugotan nga magpundo sab sa among dapit okay ra sila maglabay labay basta dili lang gyod sila magpundo kay kami ang apektado." pasabot ni Acosta.

Gipasabot sab niini nga wala silay gidapigan sundalo man kini o dili.

Gikalipay lamang sa mga bakwit nga gisuportahan sila karon ni Governor Yevgeny Vicente Emano sa ilang mga pangihanglan labina sa pagkaon.

"Nalipay sab mi kay naay pagkaon ug medisina gihatag si Gov Bambi." matud niini.

Dugang niini nga kung aduna may kakulangon kini mao ang kahoy aron magamit nila sa pagluto sa gihatag nga bugas ug uban food packs alang kanila. Lakip ang tubig aron dili sila magsakit.

Samtang gibutyag ni Emano nga gitugyan na niya ngadto sa Provincial Risk Reduction Management Department (PDRRMD) nga mahatag ang ilang panginahanglan sa mga bakwit diin gitahasan sab niining tanan ulo sa departamento ang lakip sa maglantaw sa ilang mga demanda.

Samtang sa parte sa mga sundalo ilang gipasabot nga sila ang tinoud nga sundalo nga andam mohatag og seguridad sa mga bakwit.

Giklaro sab ni Lt. Col. Rey Anthony Derilo commander sa 58th Infantry Battalion nga magpabilin ang ilang paghatag og seguridad ngadto sa mga residente aron mahatag kanila ang seguridad labina daw sila ang tinoud nga sundalo sa katawhan.


VIEW COMMENTS