SECTIONS
Thursday , June 21, 2018
SUPERBALITA DAVAO

Top 9 drug pusher sa Davao region, nalit-ag

JOSE ABAD SANTOS, Davao Occidental -- Sikop sa operatiba sa Philippine Drug Enforcement Agency (PDEA) Davao ang gikonsiderang Top 9 drug personality sa Davao Occidental.

Usa ka hiniusang puwersa ang gihimo sa tanang unit sa otoridad sa Davao Occidental aron mapahigayon ang drug bust alas 2:10 sa hapon niadtong Martes, Hunyo 12, sa Barangay Balangunan.

Ang suspetsado nailhang si Jimmy Mansur, 40, minyo, mag-uuma ug residente sa nasampit nga dapit.

Dihang nagpositibo ang pagbaligya sa suspek gilayon kining giposasan ug nakuha sa iyang posisyon ang usa ka kilo nga pinaugang dahon sa marijuana nga dunay street value nga P10,000.

Nakuha sab ang 10 gramos nga gituohang shabu nga mokantidad og P68,000, ug ang marked money.

Si Mansur mao ang number 9 sa regional target list sa PDEA, siya sab ang gikonsiderang big time drug perpetrators nga nag-operate sa Davao Region.

Sa kasamtangan, ang suspek gibalhog na sa prisohan kinsa pasakaan og kasong pagsupak sa Republic Act 9165 kun on Comprehensive Dangerous Drug Act of 2002 didto sa korte. (Jeepy P. Compio)


VIEW COMMENTS