SECTIONS
Saturday , June 23, 2018
SUPERBALITA CEBU

50 ka mga piniriso ibalhin sa lungsod sa Medellin

MOABOT ngadto sa 50 ka mga piniriso sa Cebu Provincial Detention and Rehabilitation Center (CPDRC) ang ibalhin sa Medellin District Jail didto sa lungsod sa Medellin, Sugbo.

Gi-aprubahan sa korte ang hangyo sa jail management alang niini alang usab sa pagpaluag sa provincial jail.

Samtang, laing dul-an sa 30 ka mga “mentally disturbed” nga piniriso ang ipa-assess alang sa posibleng pagbalhin ngadto sa mental hospital.

Moabot na sa 3,891 ang kinatibuk-ang ihap sa mga piniriso sa CPDRC bisan ug angay ra masud ang 1,500 inmates.

Matod ni CPDRC Warden Reynaldo Valmoria, gitugot sa korte ang pagbalhin sa mga piniriso mas duol kini sa Bogo City Regional Trial Court, diin gihusay ang ilang kaso.

Napahibalo na labot niini ang Bureau of Jail Management and Penology (BJMP), nga maoy nagdumala sa prisohan sa Medellin.

Nangayo og duha ka buwan nga lugway ang BJMP sa dili pa modawat og dugang piniriso sanglit nagpadayon pa usab ang pag-trabaho sa dugang pasilidad sa Medellin District Jail.

Samtang, nakig-alayon sab karon ang CPDRC management sa Vicente Sotto Memorial Medical Center alang sa tinguhang pagsusi sa moabot 26 ka mga piniriso nga gituohang “mentally disturbed” o may kakulian sa pangisip.

Matod ni Valmoria, kon dunay tinuoray nga problema sa pangisip ang maong mga piniriso, angayang ibalhin sila ngadto sa usa ka psychiatric facility. Sa pagka-karon, gi-isolate ang maong mga piniriso.

“Dili ni angay diri kay mo-worsen man ni diri,” pasabot ni Valmoria. (AZLG)


VIEW COMMENTS