SECTIONS
Wednesday , June 20, 2018
SUPERBALITA CEBU

Mga frat gibantayan sa DepEd

SUKAD nga niabli ang klase sayo ning buwana, hugot nga gibantayan sa Department of Education (DepEd)- Mandaue ug kapulisan sa dakbayan ang pagpang-recruit sa mga fraternity og mga bag-ong miyembro sa mga tunghaan sa dakbayan.

Kini maoy gipaambit ni Dr. Estella Susvilla, assistant school division superintendent, sa dihang nahinabi sa mga tigbalita.

Tungod niini, ang DepEd nihangyo sa mga ginikanan nga monitoron ang ilang mga tinun-ang anak ug di pasagdan human sa klase.

“Ang atong pahimangno sa atong mga ginikanan, as much as possible, i-monitor gyud nato ang mga anak. Di gyud nato pasagdaan nga after sa klase, pwede na sila molakaw bisag asa,” ni Susvilla sa mga tigbalita.

Dugang niya nga gibuhat tanan sa mga tunghaan ang tanan aron nga di matintal ang mga tinun-an sa pagsulod sa maong mga grupo.

Ang pangulo sa operation sa Mandaue City Police Office, Superintendent Jimmy Aguisanda, sa laing bahin, nangkanayon nga ila sab unyang ipatawag ang mga lider sa fraternity sa dakbayan alang sa covenant signing nga mopasalig og kooperasyon sa mga awtoridad.

Matod ni Aguisanda nga alang sa pagsumpo sa mga krimen diin nalambigit ang mga gang, hugot ug padayon nilang gipatuman ang implementasyon sa curfew ordinance apan hagit sa ilang buhatan ang maru nga mga batan-on nga motago kon mag-roving na ang mga pulis.

Sigun sab ni Susvilla nga pipila sa mga lakang nga gibuhat sa DepEd mao nga ikoordinar sa mga gwardiya sa tunghaan ang paggawas sa mga tinun-an sa tunghaan ug di sab basta-basta pasudlon ang mga out of school youth sa mga tunghaan. (JPP)


VIEW COMMENTS