SECTIONS
Thursday , June 21, 2018
SUPERBALITA CEBU

Barrita: Cebu BRT project, hanap gihapon?

NAGPABILING hanap ug way klaro kon mapatuman ba gyud ang P17 bilyunes nga Cebu Bus Rapid Transit (BRT). Mao kini ang proyekto nga giduso ni Cebu City Mayor Tomas Osmeña nga usa sa mga solusyon sa kahuot sa trapiko sa syudad.

Apan duha ka mga dagkong opisyales, sila si Transportation Secretary Arthur Tugade ug Presidential Assistant for the Visayas Michael Dino mirekomendar ngadto sa kalihim sa panalapi nga kanselahon kini.

Lakip sa ilang mga katarungan sa pagkanselar sa maong proyekto mao ang kahuot sa mga karsada nga agian sa BRT, way exclusive lane alang sa BRT sa Banilad-Talamban corridor ug ang dugang gasto sa kalangan sa maong proyekto.

* * *

Kabahin sa pundo sa pagpatuman sa BRT mao ang loan nga US$141 milyunes sa World Bank ug laing loan nga $57 milyunes sa French Development Agency. Nakuha ang loan gikan sa maong duha ka mga ahensiya human sa taud-taod nga negosasyon.

Sa dihang girekomendar ang pagkanselar sa Cebu BRT project, dali kaayong nisugyot si Marikina City Rep. Bayani Fernando nga ibalhin ang pundo niini ngadto sa susamang proyekto didto sa Metro Manila.

Si Cebu City north district Rep. Raul del Mar namahayag nga iya kining supakon. Si Cebu City Administrator Nigel Paul Villarete niingon sab nga di kini mahimo kay ang pundo gikan sa utang. Kon kanselahon ang Cebu BRT, bawion ang pundo sa nagpautang, matod pa niya.

* * *

Apan ang ulahing kalamboan nag-ingon nga sa survey nga gihimo sa World Bank ug sa French Development Agency niadtong Mayo 15 ngadto sa 23, ang World Bank kombinsido gihapon nga “viable” ang Cebu BRT project.

Ang taho sa World Bank nag-ingon nga ang Cebu BRT project gidensinyo nga mohaum sa lokal nga kahimtang, lakip na sa kahuot sa mga karsada sa syudad, mga kondisyones nga adunay technical solutions.

Unsa man diay ang nakalangan sa pagpatuman sa BRT sa Cebu City? Maghuwat pa ta sa light railway transit (LRT) system? Di kaha mas maayo nga duna tay BRT, duna pa gyuy LRT?


VIEW COMMENTS