SECTIONS
Thursday , June 21, 2018
SUPERBALITA CEBU

Original design sa P1.5 B building sa Capitol ipabilin

MAGPABILIN ang orihinal nga desinyo sa 20 ka andana nga resource center sud sa compound sa Kapitolyo ug paabangan gihapon ang pipila ka bahin sa edipisyo, sumala ni Gobernador Hilario Davide III.

Kini bisan sa mga sugyot ni Architect Melva Java, consultant on heritage sa buhatan ni Bise Gobernador Agnes Magpale, nga usbon ang desinyo sa edipisyo aron mapanalipdan ang dignidad sa Capitol building.

Ang gobernador nipasabot nga dili mahimo nga wagtangon ang commercial nga katuyoan sa tukoron nga P1.525 bilyones nga building kay makatabang kini sa ilang bayranan sa banko.

Sud sa 10 ka tuig, nalantawan mabayran sa Kapitolyo ang utang niini sa Development Bank of the Philippines (DBP).

“Atong bawion, that’s our way of repaying our obligation to the bank. And according sa projection sa nag-design ana, sa financials within 10 years mabawi na nato,” pahayag ni Davide sa pakighinab sa mga tigbalita kagahapon atol sa blessing sa bag-ong buhatana sa Maritime Industry Authority (Marina) 7.

Niadtong Hunyo 1, gilagdaan ang memorandum of agreement alang sa P1.525 bilyones nga utangon sa kagamhanan sa lalawigan sa Sugbo alang sa pagpatukod sa builing.

Moabot sa 2.9 porseynto matag tuig ang tukma nga interest sa loan sa Kapitolyo gikan sa DBP.

Si Davide nidugang nga tulo ka tuig nga gitun-an ug giplanohan ang building sa wala pa sila mokonsulta ug nagpatawag usab og public consultation.

Sa karon, nag-ung-ong na sa Office of the building Official ang ilang aplikasyon alang sa pagtukod sa resource center.

Si Davide nidugang nga gawas sa pagpahiluna sa ubang mga buhatan sa Kapitolyo sa maong edipisyo, ang ubang bahin niini kay ilang paabangan.

Si Java unang nisugyot nga minosan ang mga andana sa building aron magpabilin ang dignidad sa Kapitolyo nga simbolo sa pangatungdanan sa lalawigan sa Sugbo. (SCG)


VIEW COMMENTS