SECTIONS
Wednesday , June 20, 2018
SUPERBALITA CEBU

Drugs, sigarilyo, Nubain sa kinatawo

TULO ka mga babaye nga suway nga nipalusot sa illegal nga drugas sa Cebu City Jail nangasikop human madiskobrehi ang kontrabando nga gipasok sa ilang mga kinatawo kagahapon sa buntag.

Unang nasikop mao si Estelia Molina Orcullo, 44, taga Taboan Market, Barangay San Nicolas, siyudad sa Sugbo.

Alas 9:10 kagahapon sa buntag misulod si Orcullo sa main entrance sa Cebu City Jail apan siya girekisa sa mga babaying Jail Officer ug gisusi ang posibling gitagoan sa mga kontrabando.

Sa iyang lawas wa silay nakuha nga illegal nga butang, apan sa dihang gihiling na ang kinatawo niini nga usa sa mga proseso sa mga babaying dalaw, didto na nakita ang dakong putos nga gisulod sa condom nga gipasok sa kinatawo niini.

Moabot ngadto sa 101 gramos ang gituohang shabu nga gibana-bana sa Bureau of Jail Management and Penology 7 nga mobalor og P500,000.

Paglabay sa usa ka oras, laing babaye ang nadakpan human nakuhaan og 5 grams sa gituohang shabu nga gipasok usab sa iyang kinatawo nga gibana-bana nga mobalor og P25,000.

Giila ang dinakpan nga si Rasalina Vailoces, 33, taga barangay Carreta, siyudad sa Sugbo.

Samtang si Tennie Olano, 45, lumad nga taga Guindulman, Bohol apan kasamtangan nga nag puyo sa Purok Manga, Compostela, Sugbo, nakuhaan og siyam ka ampule sa Nubain.

Matod ni Jail Supt. Renante Rubio, jail warden sa Cebu City Jail, nga wa motug-an ang mga dinakpan kon kinsa ang hatagan niadtong mga kontrabando sa mga inmate.

Giingong inig sulod sa bilangoan sugaton silag tawo bugti sa P2,000 nga suhol kon malampuson ang ilang gihimo.

“Ang ilang sulti wala kuno sila kaila. Gipadala ra daw sa ilaha nya naay mosugat pag-abot. Mao na ang style nila dili sila kaila sa naghatag ug hatagan” matod ni Supt. Renante Rubio.

Gidayeg sa Jail Warden ang iyang mga sakop kay kon malampuson nga nakasulod ang maong illegal nga drugas, daw sa magpista ang mga inmate.

Kasamtangan nga gi kustodiya karon sa Guadalupe police station ang tulo ka mga dinakpan samtang giandam pa ang kaso ug ang resulta unya sa gihimong examination sa Philippine Drug Enforcement Agency 7 sa illegal nga drugas nga nakuha sa mga dinakpan. (AYB)


VIEW COMMENTS