USA ka strength ug conditioning workshop ang gilusad sa usa ka beteranong coach gikan sa Canada Biyernes, Hunyo 15, sa Ateneo de Davao University (Addu) Grade School Audio-Visual Room.
Si Marc Dagenais, usa ka elite-level softball, ug strength and conditioning coach, ang nangulo sa duha ka adlaw nga workshop ug seminar nga gitambongan og 40 coaches, sports leaders and leader-athletes gikan sa Davao, General Santos, Cagayan de Oro, ug Tagum.
Una niini, atol sa Davao Sportswriters Association (DSA) Forum didto sa Annex of SM City Davao niadtong Huwebes, gibutyag ni Marc nga gusto niya mapaambit iyang kahibalo dinhi sa rehiyon.
"You can never learn too much," ni Dagenais kinsa coach sa ilang nasud sulod 25 ka tuig.
"I have loved coaching more than playing," niya pa nga nagsugod na siya og coaching sa edad 13.
Isip National Coaching Certification Program level four coach, Sports Conditioning Specialist, Certified Strength and Conditioning Coach, National Strength and Conditioning Association, Personal Trainer Specialist, Canadian Association of Fitness Professionals, ug Canadian Red Cross member ang usa sa mga kredensyal ni Dagenais.
Samtang sa Hunyo 22 hangtud 24, mohimo sab si Dagenais og tulo ka adlaw nga softball workshop sa University of Southeastern Philippines.
Ang rehistrasyon nagkantidad og P3,000 lakip ang pagkaon, t-shirt ug handouts. (Marizz R. Perez)