MAGUINDANAO -- Misaka na sa 14,527 ka tawo o 2,971 ka pamilya ang mihiklin sa probinsiya sa nagpadayon nga law enforcement operation sa Joint Task Force Central batok sa mga terorista sa Liguasan Delta.
Sumala ni Bai Limba Inat, molupyo sa Barangay Talitay, Datu Montawal, Maguindanao, nga mihiklin sila gumikan sa kahadlok sa mga dagkong buto sa bomba gikan sa mga abyon sa Philippine Air Force ug mga kanyon.
Daw linog nga moigo sa yuta ang bomba ug halos mabungol sila sa gilusad nga air to ground assault sa militar batok sa Bangsamoro Islamic Freedom Fighters (BIFF)-Isis inspired group sa utlanan sa North Cotabato ug Maguindanao.
Bisan pa man sa ilang kahadlok, gibati gihapon sila og kalipay gumikan nahatagan sila og relief goods sa Department of Social Welfare and Development-Autonomous Region in Muslim Mindanao (DSWD-Armm) ug LGU-Datu Montawal, Maguindanao.
Gikanayon sab ni Datu Montawal Vice Mayor Datu Otho Montawal nga tulo ka barangay sa Datu Montawal nga gilangkuban sa Barangay Talitay, Bulod, ug Dungguan namakwit ang mga sibilyan gumikan duol lang kini sa Liguasan Delta.
Nakig-alayon dayon sila Mayor Vicman Montawal ug Vice Mayor Datu Otho Montawal sa DSWD-Armm ug nang-apud-apod sa hinabang ngadto sa mga bakwit.
Gihulat sab sa LGU-Datu Montawal ang tabang gikan sa Provincial Government sa Maguindanao nga gipangulohan ni Governor Esmael Mangudadatu uban ang Maguindanao People's Medical Team. (Edgar Fuerzas)