DI mga buaya diha sa Batasang Pambansa ang lakip sa mga mananap nga among nakit-an kagahapon diha sa Cebu Safari and Adventure Park sa lungsod sa Carmen.
Apan alang kanako, mas makalilisang ang mga buaya nga naa sa Kongreso nga maoy moutingkay unya sa proposal sa bag-ong batakang balaod sa nasud.
Mao kini ang mga buaya nga akong gikahadlokang motuis unya sa giandam sa Constitutional Committee nga nagtuki kabahin sa alternatibong konstitusyon nga nagduso sa pederalismo.
Gikuyawan ko nga mao kini sila ang mousab sa batakang balaod aron mopabor sa ilang mga interes.
Kahinumdiman, ang ConCom namugna bunga sa Executive Order No. 10 nga gipirmahan ni Presidente Rodrigo Roa Duterte kabahin sa pagbag-o sa Konstitusyon subay sa gitinguha nga kausaban padulong sa pederalismo.
Ugma, nagplano ko nga motambong ug maminaw sa dakong konsultasyon nga ipahigayon sa ConCom didto sa Negros Convention Center sa Syudad sa Dumaguete.
Mao kini ang una sa tulo ka konsultasyon nga ipahigayon sa ConCom sa tibuok nasud. Human sa konsultasyon, ipahigayon ang usa ka press conference sa Southview Hotel.
Naa say ipahigayon nga Town Hall Meeting ug Federalism Rally diha sa maong Syudad.
Ang sunod nga mga hugna sa konsultasyon ipahigayon karong Hunyo 25-27 sa Syudad sa Baguio ug sa Syudad sa Legaspi karong Hulyo 5-7, 2018.
Ang akong gikahadlokan kay di man ang ConCom mao ang final say sa draft sa proposal.
Tukion na man sab kini sa Kongreso ug Senado nga i-convert ngadto sa usa ka Constituent Assembly.
Ang final nga draft anha ipahigayon sa pundokanan sa mga buaya nga politiko sa Pilipinas.
Safari
Nangayo na kog pasaylo sa mga buaya nga among nakit-an didto sa Safari kay di ba insulto alang kanila nga matandi sa mga buaya sa Kongreso ug Senado?
Dayon, dili lang buaya ang atong makita sa maong pasilidad nga nindot kaayo nga naa sa lalawigan sa Sugbo. Lalim bay, naay orange ug white tiger, naa mga zebra ug giraffe, ug uban pang mga mananap.
Nindot nga once in a lifetime experience alang sa mga Sugboanon kini sa di pa modagsang ang daghan kaayong mga turista.
CICC ug Balili
Kon maghisgot kitag turista, gipaabot karon ang pag-uyon sa Syudad sa Mandaue sa usa ka proposal nga himuong usa ka tourism resort ang Cebu International Convention Center kun CICC.
Gawas sa duha ka hotel, theme park, mga pool, mga sinehan, ug grand casino, naa pa gyud kiniy convention center nga mas dako pag capacity sa CICC karon.
Ug karong nagkasabot na sila si Mayor Kristine Chiong sa Naga ug Gob. Junjun Davide, nagtuo ko nga kining kontrobersyal nga yuta sa Balili diha sa Syudad sa Naga molambo na sab. (@anol_cebu sa Twitter)