WAY plano si Carla Jane Calotes nga saulogon ang ika-20 nga kasumaran sa iyang adlaw nga natawhan niadtong Hunyo 12, 2018.
Kini kay naatol nga wa kini igong kwarta sa maong adlaw nga dungan sa adlaw sa Kaugalingnan diin nag-duty siya sa iyang internship program sa Superbalita Cebu.
Apan ang iyang mga higala nga mga klasmeyt usab niya sa kursong Bachelor of Arts in Communication sa Cebu Normal University (CNU) ang nangita og paagi nga sila makasalosalo.
Ang iyang mga amiga maoy nag-amot-amot aron ipalit og pagkaon nga maoy ilang gisaw-an sa panihapon sa panimay sa iyang higala nga si Katrina Aguirre.
Samtang, ang inahan ni Katrina nga si “Mama Char” maoy nag-sponsor sa iyang birthday cake.
Apil sa nisurprisa niya sila Paula Mendoza, Liberty Rigonan, Yvonne Saldua, April Jane Ochada, Sheil Corrine Garces ug Loydin Chavez.
Human sa salo-salo sa panihapon, sila nag-videoke sa samang balay.
Ang nakahugyaw sa videoke kay samtang si Carla nagkanta og “Faithfully”, siya nakabantay nga dunay pilit-pilit nga liquid ang nidagayday gikan sa iyang ulo padung sa iyang mga buhok ug diha na siya nakaamgo nga gibuk-an diay siya og itlog sa ulo sa iyang mga higala.
Kini nabatasan sa ubang mga pamilyang Pilipino nga magbuak og itlog sa ulo sa mga mag-birthday.
“Happy kaayo ko and wala ko nag-expect nga mao diay na ila plano,” paambit ni Carla sa surprisa sa iyang mga higala.
Pag-abot niya sa ilang balay, giandaman usab siya og pansit ug lomi sa iyang inahan nga si Carmela Sagarino, 55 alang sa iyang birthday. (SCG)