DILI angay nga kalimtan ang importansiya sa Ramadan ilabi na sa kaigsoonang Muslim.
Kini ang gibutyag ni Senador Koko Pimentel atol sa pagtapos sa Ramadan kinsa nahimo usab nga bisita sa dakbayan atol sa ika-68th nga Charter day sa dakbayan sa Cagayan de Oro.
Nagbilin kini og mensahe lunot na usab sa pagtapos sa kasaulogan sa usa ka balaang bulan sa Ramadan sa atong mga kaigsoonang mga Muslim nga angayang dili hikalimtan ang maayong gitudlo ug importansiya sa maong kasaulogan ilabi na sa panahon sa pagpuasa.
Nagpadangat usab kini og pagpasidungog ilabi na sa niadtong mga nagtamod gayud sa usa ka bulan nga pagpuasa.
“Congratulations to all of those who observed the Ramadan and then do not forget the lessons of Ramadan is, for all of us especially for our Muslim brethren to know to identify the with people who are suffering that is the importance of the lessons of Ramadan so let’s not forget this,” pahayag ni Pimentel.
Nasayran nga mokabat sa libo-an kapin kon kulang nga mga kaigsoonang Muslim ang nagkatigom sa Pelaez Sports Center sa sayong kabuntagon ug malampuson kining natapos.
Sa pakighinabi sa SunStar SuperBalita kang Police Superintendent Mardy Hortillosa, tigpaman sa Cagayan de Oro Police Office (Cocpo), gibutyag niini nga kapin kong kulang 1,500 mil ka mga Muslin ang niduyog sa Eid’l Fitr.
Nagpaabot usab ang kapolisan og pasalamat lakip na usab pagpaabot og mensahe sa malipayong pagsaulog sa maong balaan nga kasaulogan alang sa kaigsoonang mga Muslim.
“Nagpasalamat kita sa katawhan ilabi na nga nagcelebrate sa Eid’l Fitr atong Muslim community amo lang ipaabot sa ilaha nga among City Director si P/Sr.Supt Nelson Aganon ug among Regional Director si P/Chief Supt. Timoteo Gaston Pacleb, nagpaabot nga “Happy Eid’l Fitr,” pahayag ni Hortillosa.
Mapasalamaton ang kapolisan gumikan kay malampuson ug malinawon nga natapos ang maong mga kasaulogan sa tibuok adlaw ug wala’y mga natalang mga dagkong insidente sa siyudad.