GIPASUYA lang ug dili niini buot nga malipay ang mga nakabangi karong mga panahona hinungdan nga dili kini direkta mobutyag nga dili modagan sa pagka senador o sa congress sa umaabot nga eleksiyon.
Atol sa gipahigayong mass oath taking sa mga bag-ong opisyales sa dakbayan sa Cagayan de Oro sa Limketkai mall, namahimong guest speaker ang presidential daughter ug kasamtangang mayor sa Davao City nga si Sara Duterte-Carpio.
Sa gihimong mensahe niini, giingong dili kini magpapili sa pagka senator apan dili kini direkta nga mobutyag kaniadto aron nga masuya si Senator Antonio Trillanes IV kinsa mao’y kaaway karong mga panahona.
“Kabalo mo sa tinuod lang dili gyud ko modagan og senator. sa tinuod lang, wala gyud ko’y plano nga modagan og senator but the reason why ngano dili lang ko mosulti nga dili ko modagan og Senador is that para nga masuya sila ba,” ang nagpahiyom nga pahayag ni Sara.
Gidugang pa niini nga dili siya buot nga malipay karong mga panahona ang iyang mga nakaaway.
“Ug mosuliti ko nga di ko modagan, di naman ka nila i-apil sa survery so pag dili naka i-apil sa survey mosulod na tong ilahang mga kandidato didto, so malipay na sila. I do not want to give them that happiness karon, unya na pag filing na sa candidacy pwedi na sila malipay kay wa ko midagan,” dugang pa niini.
Gilakip usab niini ang kabangi nga si House Speaker Pantaleon Alvarez nga buot niyang dili una kini malipay nga dili siya magpapili.
Kahinumdoman nga nagbingkil ang duha human nga gilibak kini nga alyansa sa oposisyon gumikan kay nagmugna kini og regional political party.
“In support, duha man na sila ang akoang kaaway si Trillanes ug si Speaker Alvarez, kay kung modagan ko og congress didto sa Davao City gina expect man na nila nga mag speaker of the house of representative ko," ang dalang sungog nga pahayag niini.
Giklaro niini nga ang tumong gayud sa paghidangat sa siyudad mao nga magpasalamat sa katawhan ug dili tungod kay magpapili kini sa umaabot nga eleksiyon isip pagka senador sa nasud.
“Pero wala ko dinhi karong buntaga tungod kay modagan ko og Senator naa ko dinhi kay gusto ko magpasalamat sa inyohang overwhelming full support sa kampanya ug sa karon sa administration ni President Duterte,” dugang niini.
Giingong buot niini nga personal nga magpasalamat sa katawhan sa siyudad ug Misamis Oriental diin nga usa sa mga nag-unang nagpakita og dakong suporta sa iyang amahan nga si Presidente Rodrigo Duterte panahon sa ni-aging kumpanya ug eleksiyon.