Pagpamomba sa BIFF napugngan

ESPERANZA, Sultan Kudarat -- Usa ka dakong klase sa improvised explosive device (IED) ang nadepyos sa mga sundalo ug pulis alas 5:30 sa buntag niadtong adlaw nga Biyernes, Hunyo 15, sa probinsiya sa Sultan Kudarat.

Sumala ni 6th Infantry (Kampilan) Division (ID) Spokesman Captain Arvin Encinas nga nasiplatan sa mga sibilyan ang usa ka babaye nga nagbilin og bag daplin sa national highway sa Barangay Poblacion, Esperanza Sultan Kudarat.

Sa diha nga gi-ablihan sa mga pulis ug mga sakop sa 1st Mechanized Battalion Philippine Army ang bag, positibo nga bomba ang sulod.

Nahiabot sab dayon ang mga sakop sa Explosive Ordnance Disposal (EOD) team sa Philippine Army ug luwas kining nadepyos.

Ang bomba gilangkuban sa time fuse, plastic container, packaging tape, pieces of metallic items, gray powdered substance ug detonator.

Giingong grupo sa Bangsamoro Islamic Freedom Fighters (Biff) ang gitudlo ni 6th ID Chief Brigadier General Cirilito Sobejana nga suspek sa pagbilin sa bomba.

Gusto nga iliko (divert) sa mga terorista ang operasyon sa Joint Task Force Central sa Liguasan Delta batok sa Biff-Isis Inspired Group ug Daesh Terrorist Group.

Sa kasamtangan, anaa sa pinakataas nga alerto ang mga awtoridad sa Sultan Kudarat sa hulgang pagpamomba ug pagpangatake sa mga terorista. (Edgar Fuerzas)