KON unsa ang atong pag-abuso sa kalikupan o walay pagpakabana, kining tanan seguradong mosumbalik kanato ug mas grabe pa ang epekto. Kinsay mabasol? Walay lain, ikaw nga walay hunahuna sa pagpahiluna sa insaktong hugaw sama sa basura nga nagkatag lang kada adlaw. Ning bag-ong pag-abot sa panahon sa ting-uwan gikan sa ting-init, maklaro ang tanan - nangabara sa mga kanal ug mga hugaw nga magtapok sa tunga sa dalan human sa pagbunok sa uwan. Dayon tanang reklamo?
Gibutyag sa Department of Engineering and Public Works (DEPW) sa dakbayan sa Sugbo nga grabe kadaghan ang ilang tubagon nga hangyo sa paglimpiyo sa kanal matag adlaw tungod sa pagkabara sa mga basura nga sagad plastik nga botilya ug cellophane nga dugay o dili malata. Ug sa kadako sa dakbayan, halos dili na maatiman tanan sa mga sakop sa DEPW. Sumala ni Engr. Nilo Igot, assistant city engineer, nga gikutlo sa taho sa SunStar Cebu nagkanayon nga dili mominos 30 ka mga tawag-hangyo ang ilang madawat matag adlaw sa pag-ayo sa aginanan sa tubig o paghipos sa hugaw human sa baha.
Tinuod dili tiaw kini nga trabaho. Nasayod kita nga daghan pang ubang atimanon ang DEPW nga mabalda human makatutok sa pagtubag sa atong tawag alang sa paglimliyo sa palibot nga kita lang usab ang hinungdan nga nahugaw kini? Unsay gihimo sa bag-ong mga opisyal sa barangay lakip sa Sangguniang Kabataan (SK)? Maayo lang kamo magkasabot bahin sa pagpangaligo sa dagat o nagplano og bakasyon sa pasangasil nga study tour? Nisud kamo sa pagka opisyal sa barangay aron moserbisyo, dili magpakaasyuso.
Bahin sa kalimpiyo sa palibot, maayong maghiusa ang komunidad. Dili magsalig sa DEPW nga motapol usab usahay tungod sa kahago Labaw tanan, hipuson nato ang atong huhaw sa tukma nga dapit. Magpabana sa kalimpiyo sa palibot. Sa maong pamaagi, positibo nga resulta nga mosumbalik kanato.