MIKALIT og kainit ang makalaay nga duwa dihang niulbo ang kagubot nga gidugkatan nila ni Johnriel Saycon sa University of San Carlos (USC) Warriors ug Tristan Albina sa University of the Visayas (UV) Green Lancers sa CESAFI 2018 Partner’s Cup sa Cebu Coliseum kagahapon.
Ang defending champions Green Lancers, nga mao ang mingdaog sa duwa, 94-67, nagbangis dayon sa pagsugod hangtod nga ilang nalubong og taga liog ang Warriors.
Apan sa wala damha, nagkabangga ug nagbinigyanay sila si Saycon ug Albina nga maoy nagpatumba kanilang duha sa nahabiling 4:51 minutos sa duwa. Niadtong gutloa, naglabaw ang Green Lancers, 68-57.
Sa ilang pagkatumba, si Albina naggunit sa iyang apapangig samtang si Saycon naggunit sa iyang tiyan.
Unang nakabarog si Albina ug mideretso kini sa lingkuranan sa Green Lancers.
Taodtaod pa nga naglubog si Saycon sa sawog apan dihang nakabarog, kalit lang kining midagan paingon kang Albina dayong sukmag.
Niadtong higayuna, diriyot miulbo ang grabeng kasamok gumikan kay nanulod na sa korte ang mga ubang mga magduduwa sa duha ka mga kampo.
Ang uban makita nga nag-uwang apan aduna sa’y tatawng milaban lang sa ilang tagsatagsa ka kauban.
Dihang nakontrolar na ang sitwasyon, parehong na-ejected sa duwa sila si Albina ug Saycon. Si Saycon gipahamtangan supensyon sa tibuok pre-season.
Nagkanayon si commissioner Felix Tiukinhoy nga pahamtangan sab nila’g multa si Saycon apan wala pa sila makadeisyon sa kantidad.
Ang Green Lancers naghupot og 1-0 nga rekord samtang ang Warriors natagak sa 2-1 nga baraha.
Sa high school nga kombati, gipangmakmak sa University of Cebu (UC) Baby Wedmasters ang University of San Jose Recoletos (USJ-R) Baby Jaguars, 73-63.
Ang Baby Webmasters mingsaka sa 2-0 nga rekord samtang ang Baby Jaguars natagak sa 0-2. (ESL)