HUMAN sila nakadiskubre nga aduna sila’y mga estudyante nga naghupot og potensyal sa paugnat sa kusog partikyular ang basketball, ang Formative Academic and Skills Development School (FASDS) sa lungsod sa Liloan, Cebu nakadesisyon nga mohimo’g lakang aron makatabang sa pag-umol sa mga abilidad niini.
Tungod niini, nahan-ay ang pagpahigayon sa 1st Formative Cup Inter-Company and Inter-Subdivision nga gikatakdang sugdan karong Hunyo 24 sa FASDS basketball court sa Cotcot, Liloan, Cebu.
Ang torneyo gibahin sa Under-17 ug Under 21 categories alang sa Inter-Subdivision samtang wala’y age limit ang Inter-Company. Ang FASDS adunay team nga mosalmot alang sa Under-17.
Gipasabot sa tag-iya sa FASDS nga si Lemuel Lapingcao nga taodtaod na sab silang nagplano niini apan karon lang kini nila nahatagan og katumanan.
“We want to unite ourselves with this activity. This is our second try. Unfortunately for the past two years, we don’t have enough participating teams,” matod ni Lapingcao sa press conference kagahapon sa FASDS.
Ang kampiyon sa Inter-Company makadawat og P15 samtang P10,000 sa 2nd placer samtang ang mopatigbabaw sa Inter-Subdivision U-17 ug U-21 categories parehong makakuha og P10,000 samtang P5,000 sa 2nd placer.
Nagkanayon si coach Fred Ian Castanares nga ning puntoha, padayon pa ang ilang rehistrasyon. (ESL)