TINDERA sa usa ka dakong tindahan, nasikop nakuhaag binultong drugas uban ang upat ka kunsabo sa miaging kadlawon sa Banawa, Brgy.Guadalupe, dakbayan sa Sugbo.
Si Crislyn Barabat, 28, minyo, taga Banawa Gun Club, Guadalupe, tindera sa Gaisano Metro, nadakpan sa mga sakop sa PDEA-7 human sa buy bust operation.
Samtang nasikop ang mga kauban ni Crislyn, nga sila si Christopher Charls Lawas, 37, minyo, taga Brgy.Pahina Central, Cebu City; Vanessa Maybanting, 28; taga Gun Club Banawa, Clark Barabat, 25, ulitawo, taga Gun Club Banawa, ug igsuon nga si Ailyn Barabat.
Ang mga ahente sa PDEA-7 mipahigayon sa buy bust operation human sa pipila ka semanang surviellance sa mga dinakpan.
Sa nakuhang impormasyon sa PDEA-7, si Crislyn gikatahong maoy nipadagan sa ilegal nga kalihukan diin kontak niini ang iyang bana nga si Ivan Barabat nga nabilango sa Muntinlupa.
Giingong kinilo ang madisposed ni Crislyn, diin siyay gitahasan sa pag-distribute dinhi sa Sugbu.
Ang mga ahente sa PDEA-7 mi-transact kinig usa ka bultong drugas nga mobalor sa P15,000 ginamit ang boddle money dihang mikagat kini daling gipusasan.
Gawas sa dakong bultong pinutos nakuhaan sab silag 10 ka putos tanan motimbang sa 50 gramos nga gibanabanang mobalor sa P340,000 sa DDB-value.
Lakip sa nakuha ang usa ka digital weighing scale, ligther mga basiyo sa bundle plastic sudlanan sa drugas, mga kahimanan sa pagbahig sa drugas.
Ang mga kauban niini naaktuhan sab sa mga ahente atol sa transaction nga nagbahig sa gidiling drugas.
Giingong si Crislyn, kinilo ang ma-disposed niini nga gisubay na sa PDEA-7 ang ubang koneksyon niini.
Si Crislyn nga nahinabi sa Superbalita Cebu nagkanayon nga tulo iyang anak kaluha ang duha ug nagtindera siya sa Gaisano Metro samtang nabilango iyang bana sa Muntinlupa gumikan sa kasong murder.
Bag-uhay pa usab siyang mipauli gikan mibisiya sa iyang bana sa Muntinlupa.
Apan hugtanon siyang nanghimakak sa pasangil nga nalambigit siya sa pagpalusot sa gidiling drugas u nanghimakak ang iyang mga kauban. (GPL)