WAY nakitang sayop si Gob. Hilario Davide III kon ipresentar ngadto sa media ang mga suspek sa lainlaing mga krimen nga nahitabo.
Ang gobernador, usa ka abogado, nipasabot nga pinaagi sa pagpresentar sa mga suspek sa krimen mapahibawo ang publiko aron makatabang sa imbestigasyon.
“Sa states gani dunay mga criminals, dunay mga suspect, ila mang i-publish nila ang mga nawong for people to know and to report if they see them,” pahayag ni Davide, chairman sa Regional Peace and Order Council (RPOC) 7, dihang nahinabi sa mga tigbalita niadtong Biyernes.
Kini ang reaksyon sa gobernador human ang Philippine National Police nihukom nga dili na iatubang ngadto sa mga sakop sa media ang madakpan nga mga suspek sa bisan unsa nga mga kaso.
Ang Commission on Human Rights (CHR) nalipay sa desisyon sa PNP.
Sumala Jacqueline de Guia, tigpamaba sa ulohang buhatan sa CHR base sa balita sa kaulohan, namahayag nga maayo ang inisyatiba sa PNP isip tubag sa pagtuman sa standard sa human rights kabahin sa due process ug pag-ila sa katungod sa mga suspek nga nangasikop kay sila giila nga inosente hangtod di mamatud-an sa korte.
Si PNP Chief Oscar Albayalde niingon niadtong Lunes nga kabahin sa paningkamot sa PNP nga iobserbar ang due process.
Matod niya, igo lang sila nagpatuman sa palisiya nga way suspek bisan sa mga criminal nga ipakita ngadto sa media.
Niadtong 2008, ang PNP nga ubos kaniadto ni kanhi PNP Cief Director General Jesus Versoza, nihunong sa naandan nga practice sa mga tawo agi go tubag sa opinion ni kanhi Commission on Human Rights (CHR) sa pagpalinya sa mga suspek krimen aron iatubang sa mga sakop s amedia.
Gipaneguro sa PNP nga dili bug-at ang mamahimong epekto niini sa mga tigbalita ug makadawat gihapon kini og mga impormasyon labot sa mga suspek sa krimen nga nangasikop. (SCG)