UPAT ka tawo nga naatlan nga nag-repack og shabu ang nasikop sa kapulisan kagahapon sa kaadlawon sa Sitio Zapatera, Bo. Luz, dakbayan sa Sugbo diin kapin sa P200,000 nga shabu ang nasakmit.
Nailhan ang nga nag-repack nga sila si Shirley Enriquez, 38; Elvin Eniquez, 27; Rolando Areglado, 39; ug si Roberto Perez alyas Budlat 34; kinsa parehong mga residente sa dapit.
Ang operasyon pinangulohan kini sa kapulisan sa Police Station 4 diin gihimo kini kagahapon sa alas 12 sa tungang gabii.
Nasakmit gikan sa mga nasikop ang nagkadaiyang pakite sa shabu diin gibana-bana nga mobalor kinig P248,266.
Usa ka impormante ang nipahibawo sa kapulisan kabahin sa ilegal nga pagpamaligya sa ginadiling drugas ni Budlat hinungdan nga nihimo dayon sila operasyon batok niini.
Pasakaan og kalapasan sa Republic Act 9165 o ang Comprehensive Dangerous Drugs Act. (HBL)