USA ka 15-anyos nga babaye ang nialegar nga gilugos siya sa usa ka Italian national sulod sa sementeryo sa Barangay Poblacion, lungsod sa Badian, Sugbo niadtong Sabado sa buntag.
Ang biktima, tinun-an sa Grade 7, namaligya og souvenirs, niasoy sa kapulisan sa Badian ug nitumbok sa usa ka Italian national (ngan gipugngan sa Superbalita Cebu samtang walay habig sa akusayon), 46, kanunay managhoy kaniya samtang mamaligya og souvenir sa beach resort sa Basdiot, Moalboal, Cebu sulod na sa pipila ka buwan.
Sumala sa bata, dihay higayon nga gihunongan siya sa suspek nga nagsakay og motorsiklo duol sa beach ug nakig-istorya kaniya ug nangutana sa iyang edad.
Gikataho nga ang langyaw nagpuyo na sa naasoy nga dapit sulod sa lima ka tuig.
Apan niadtong Sabado sa alas 8:30 sa buntag, samtang ang bata namaligya, usa ka puti nga sakyanan ang nihunong ug gibira siya sakay sa maong sakyanan.
Ang biktima niingon nga ang langyaw maoy nagmaneho sa sakyanan apan ang usa ka kamot niini naggunit kaniya.
Matod pa, ang langyaw nisulti nga dili motug-an kang bisan kinsa bugti sa kuwarta, cellphone o bisan unsa nga gusto niya.
Nisulod sila sa sementeryo ug didto gihuboan siya ug naghubo usab ang langyaw.
Sumala sa biktima, grabe nakahalok kaniya ang langyaw gikan sa taas ngadto sa ubos.
Dihang ang langyaw mopasulod na unta sa iyang kinatawo, niabot ang duha ka mga pulis ug gituktok ang pultahan sa sakyanan.
Naputol ang kahigal sa langyaw ug gidakop kini.
Gibalhog kini sa bilanggoan sa lungsod ug mag-atubang kini og kasong lugos ning adlawa. (SunStar Cebu)