ALEGRE ang eleksiyon sa Association of Barangay Councils (ABC) Cebu City chapter karong Agusto 20 human nitumaw ang posibilidad nga tulo ang mag-ilog sa pwesto sa pagka presidente.
Nahinabi sa SunStar Cebu si Mabolo Barangay Captain-elect Niña Mabatid nga bisan wala pa siya'y pinal nga hukom apan abli ang iyang pultahan sa pagdagan isip presidente sa ABC.
Wala siya mobutyag kon asang habig sa pulitika mopaubos sa iyang kandidatura sa ABC, apan nikandidato siya ubos sa Bando Osmeña Pundok Kauswagan (BOPK) sa miaging eleksiyon sa barangay.
Si Cebu City Mayor Tomas Osmeña wala makurat sa ulahing taho nga tulo ang nahugonhugon sa posisyon sa ABC.
Samtang, una nang nitumaw ang pangan ni Kasambagan Barangay Kapitan Franklyn Ong ubos sa partido nga BOPK ug si Tisa Barangay Kapitan Phillip Zafra sa Team Rama, kinsa kasamtangang presidente sa ABC.
Sila si Ong ug Zafra parehong reelected barangay captains ug nasuwayan na ang ilang liderato.
Si Mabatid niingon nga makahimo siya sa pagpangulo sa 80 ka mga barangay bisan og bag-o pa siya sa pulitika.
Hinuon, sila si Ong ug Zafra parehong wala mabalaka sa pagtumaw sa laing ngalan nga buot mangulo sa ABC sa siyudad sa Sugbo.
Si Ong niingon nga ang 54 ka barangay captains kaalyado sa BOPK nagpabiling dapig kaniya taliwala sa pamahayag ni Mabatid, kinsa nikandidato usab ubos sa BOPK.
Apan si Osmeña dili mobabag sa plano ni Mabatid sa iyang interes sa pagpangulo sa ABC. (SunStar Cebu)