MOABOT sa 10,000 metric tons o 200,000 ka mga sinakong imported nga bugas gikan sa Vietnam ang nahiabot sa Cebu International Port kagahapon sa hapon.
Si Olma Marie Bayno, information officer sa National Food Authority (NFA) sa Central Visayas, nibutyag ang mga bugas luwan sa Vina Ship Gold, barko nga gikan sa Vietnam, nga nidunggo sa CIP ala 1 sa hapon.
“Ang nakanindot ana atua na gyud ni, wala nay for other regions,” sumala niini sa pakighinabi sa Superbalita Cebu kagahapon.
Siya nipahibawo ang maong mga bugas kabahin sa 500,000 ka mga sakong bugas nga unang gisaad nga alokasyon sa ilang ulohang buhatan alang sa upat ka mga lalawigan sa Central Visayas.
Kini naglangkob sa Sugbo, Negros Oriental, Bohol ug Siquijor.
Matod niya, isud una sa ilang bodega ang maong mga bugas alang sa insaktong documentation sa dili pa masugdan ang pag-apud-apod sa katapusan ning buwana.
Ang uban niini kay magsilbi nga buffer stocks sa NFA 7, sumala ni Bayno.
Samtang ang uban kay i-apud-apod ngadto sa mga ahensiya sa gobiyerno nga nagdumala sa paghatag og relief goods.
Apil sa makadawat sa maong mga bugas ang Department of Social Welfare and Development (DSWD) 7, local disaster risk reduction and management offices (LDRRMO), local government units (LGUs) nga magamit sa ilang relief stocks panahon kon dunay kalamidad ug accredited retailers sa NFA 7.
Si Bayno nagkanayon nga dugang duha ka mga delivery sa bugas gikan sa mga nasod sa Vietnam ug Thailand ang mangabot usab sa Sugbo nga kargahan sa 300,000 ka mga sakong bugas nga gisaad sa NFA alang sa Central Visayas.
Sa pag-abot sa imported nga mga bugas, nagtuo ang usa ka opisyal sa Grain Retailers Confederation of the Philippines (Grecon) sa siyudad sa Sugbo nga makahatag kini og impact sa presyo sa commercial nga mga bugas nga gipamaligya sa kamerkadohan ug dagkong mga tindahan.
Si Erwin Gok-ong, presidente sa Grecon Cebu City North District, niingon nga kon ma-suplayan og di mominos 10 ka mga sakong bugas ang accredited nga mga retailer sa NFA 7 ug mabaligya ngadto sa mga merkado, ma-stabilize ang presyo sa commercial rice sa lokal nga mga merkado.
Niadtong Agusto sa miaging tuig, nagsugod na og kanihit ang supply sa NFA rice hinungdan nga nisaka usab ang presyo sa mga commercial rice.
Ang NFA rice gibaligya sa mga retailer sa tag P35 matag kilo kon maayo ang pagkagaling samtang tag P27 ang matag kilo kon kini regular nga pagkagaling. (SCG)