ADUNA'Y sumatotal 30 ka mga kolehiyo sa Central Visayas ang mopasaka sa ilang tuition karong nagsugod na usab ang klase alang sa school year 2018-2019, base na usab sa natala sa Commission on Higher Eduction (Ched)-Central Visayas.
Apan dili pa kini makapagawas sa listahan niining mga tunghaan kon wala pa’y go signal sa Ched Central Office.
Matod ni Dr. Carlyn Dela Peña, education supervisor sa Ched-Central Visayas, nga sa 30 ka kolehiyo, 20 niini ang nipasaka lang sa ilang freshmen level o first year samtang ang nahabiling 10, tanang levels.
Gibutyag ni Dela Peña nga sa mga aplikasyon sa tuition increase sa tanang levels niabot sa 14 ang ilang nadawat nga aplikasyon apan tulo niini ang nibawi ug dili nalang mopasaka, samtang ang usa nakapahimulos sa libreng tuition sa gobyerno diin anaa kini sa lungsod sa Sibonga.
Sa 10 nga mopasaka sa tuition sa tanang level, pito niini ka kolehiyo sa Sugbo, duha sa Bohol ug usa sa Negros Oriental.
Sa freshmen o first year level lang, niabot sa 22 ang ni-apply apan ang usa wala makaabot sa timeline, samtang ang usa dili matawag nga increase tungod kay bag-o lang kini nag-operate.
Sa 20, 16 niini ka kolehiyo sa Sugbo, samtang ang laing upat sa Negros Oriental.
Gawas sa 2.5 percent nga regional inflation rate nga rason sa pagsaka sa tuition, nipasabot si Dela Peña nga ang 70 percent niini alang sa mga magtutudlo, 20 percent niini alang sa improvements sa tunghaan, ug ang laing 10 percent alang sa return of investment.
Si Ched-Central Visayas Director Dr. Freddie Bernal, kinsa kasamtangan nga anaa sa Manila, nibutyag nga usa sa agenda sa ilang Commission En Banc meeting sa Ched Central Office mao ang pag-release na sa listahan sa mga kolehiyo nga nipasaka sa ilang tuition.
Gikatakda nga karong semanaha na kini.
Nasayran nga mas daghan karon ang nipasaka sa tuition itandi sa nakalabay nga tuig nga anaa lang sa walo ang tanang levels, samtang lima ang sa freshmen. (HBL/Superbalita Cebu)