SOLUSYON. Usa sa mga hinungdan nga mabara ang trapiko mao ang pagkawot sa dalan aron butangan sa linya sa tubig o sa korente ug ang hinay kaayo ang trabaho sa pag-ayo sa naguba nga kadalanan.
Nya pa gyuy bati nga pagka repair sa dalan.
Tungod niini nga kasinatian, si Buhay Rep. Lito Atienza, kanhi mayor sa Manila, misugyot sa Palasyo nga moisyu og Executive Order (EO) si President Duterte nga patas-an matag oras ang balayronon sa mga kontraktor sa mga kontrata sa kagamhanan.
Matud pa ni Representante Atienza, nga ang kahagip-ot sa dalan tungod sa di maayo nga trabaho sa pagkawot sa dalan dako og kadaot sa atong ekonomiya nga mokabat og bilyones ang nawala sa produksyon.
Daghan ang malangay tungod sa hinay ug di maayo nga trabaho sa dalan sama sa trabaho sa mga paktorya, sa deliberi sa mga produkto ug ang mga motrabaho di makaabot sa husto nga oras sa tingtrabaho, pung pa ni Atienza.
Wa masayop si Representante Atienza sa iyang pangagpas nga moabot sa milyunes matag tuig ang kawot sa dalan sa tibuok nasud kay dinhi sa Metro Cebu lang daan atong makita nga bisan asa ang kawot sa dalan nga hinay ang trabaho unya biyaan lang igkahoman o di ba dili maayo ang pagka-repair sa dalan.
Ang sugyot ni Atienza nga ang mangayo og permit alang sa pagkawot sa dalan aron motaud og linya sa tubig o korente pabayron og inoras aron ang kontraktor mapugos pagtapos sa trabaho sud sa kontrata.
Kon motrabaho og Lunes hangtud Biyernes imbis nga sa Sabado ug Domingo lang dunay dugang nga bayad.
Abi nimo Mr. Atienza di man lang trabaho sa pagkawot sa dalan ang hinay sa mga public works apil na niini ang pag-ayo mismo sa mga guba nga dalan nga maabtan og pipila ka adlaw, buwan usahay tuig pa.
Niadtong Marso sa miagi nga tuig, ang kagamhanan nagmando nga motrabaho lang gikan sa 10:00 sa gabii hangtud sa alas 5:00 sa buntag aron malibre ang mga dalan nga daghan ang moagi. Gani, ang Department of Transportation (DOTr), Department of Public Works and Highways (DPWH) ug ang Metro Manila Development Authority (MMDA) nagmando nga ang kontraktor mogamit og semento nga mauga sud sa 24 oras aron maagian dayon ang dalan.
Apan ang pangutana misalir ba ning mao nga reglamento? Matud pa ni Atienza nga dakong palpak ang maong reglamento kay hangtud karon naay mga kontraktor nga motrabaho lang gihapon sa adlaw ug biyaan lang ang kawot bisan asa.
Tungod niini angayan na nga mopakanaog og bag-o nga EO ang Presidente aron pagseguro nga dunay disiplina sa pag-ayo o trabaho sa kadalanan.