GIKAKURAT og maayo sa kapulisan dihang usa ka lalaki nga gituohang lango sa ginadili nga druga ang kalit misakay sa patrol car ug nagpadagan niini sa gawas sa Gitagum Police Station.
Si Senior Police Officer 2 Medwin Maagad, kinsa imbestigador sa Gitagum Police Station, namahayag sa mga tigbalita nga mga alas 8:30 sa gabii niadtong adlaw’ng Huwebes, Hunyo 14, samtang gipawangwang sa kapulisan ang ilang sakyanan diin duna sab ilang sakop nga nakabantay alang sa police visibility.
Kalit miabot ang usa ka lalaki ug deretsong gisakyan ang atubangan sa Mahindra Mobile patrol car ug gipadagan og kalit. Sa kakurat sa duha ka pulis, ila kining gilakag ug maayo na lamang nga naapas ug nahawiran usa gipakanaog.
Dihang nasapon kini sa kapolisan gidala sa police station dayon gihimo ang body search ug didto nadiskubre pinaagi sa Armed Forces of the Philippines identification card niini nga siya diay si Private First Class Keith Jan Aclo Gayda, 28 anyos, lumad nga taga Easter Samar.
Usa kini ka aktibong miyembro sa sundalo nga nadestino sa 63rd Infantry Battalion sa 8th Infantry Division ug nakabasi sa Marawi City.
Sa dugang gihimo nga pagbody search narekober gikan niini ang lima ka buhing bala sa kalibre 45, ID niini, cash ug duha ka pakete sa gitouhang shabu.
“Dili nato siya maestorya og insakto kay gasinggita siya sulod sa atong selda. Dili nato masulti kon sabog ba siya o lango sa ilimnong makahubog.” Matud ni SPO2 Maagad.
Ang suspek gipaubos dayon og drug testing diin gipaabot pa sa kapolisan ang resulta niini.
Sa pagkakaron, nagpabiling nagtingkagol sa prisuhan ang sundalo kinsa gitakdang mag-atubang og patong patong nga kaso.