SA HINGPIT nasilyohan na ang alyansa sa partido Padayon Pilipino ug Hukbong ng Pagbabago nga gipangulohan sa tsirman niini nga si Davao City Mayor Sara Duterte.
Pinaagi ni Cagayan de Oro Konsehal Nadya Emano, iyang gibasa ang intensyon sa resolusyon nga naghingpit sa ilang alyansa.
Gisaksihan sab kini sa mga napiling barangay officials gikan sa siyudad sa Cagayan de Oro ug Misamis Oriental nga nagpahigayon sa ilang oath taking isip bag-ong mamuno sa kabarangayan.
Ang pormal nga pagsilyo sa ilang pag-alyansa nagtimaan sa pasiunang lakang alang sa pagpalig-on sa relasyon sa duha ka mga grupo diin tinguha mao ang Padayon nga pagpatuman sa kabag-ohan aron mas mapalapdan pa ang tumong sa pag-uswag sa kahimtang sa katawhan dinhi sa pulo sa Mindanao.
Si Misamis Oriental Yevgeny Vincente Emano nalipay og maayo sa ilang pag alyansa tungod kay alang kaniya makatabang kini og dako sa probinsya.
"Si Mayor Sara anak ni President Duterte ug maka enganyo kini ug dugang mga negosyante aron mububo ug puhunan dinhi sa lalawigan. Kini nagpasabot ug dugang trabaho alang sa mga katawhan, mudaghan usab ang mga prudukto ug serbisyo" matud ni Emano.
Kahinumduman nga sa tuig 2017 ang Misamis Oriental milangkat ug hapit 30 bilyones nga investment nga maoy pinakadako sa tibouk rehiyon. Gitinguha ni Gov. Emano nga mas mudako pa ang investment nga maharbat sa Probinsya karong tuiga.
Ang panaghiusa gitambongan sab sa amahan sa PADAYON Pilipino kanhi governor ug Cagayan de Oro mayor Vicente Emano, sila CdeO 2nd District Representative Maxi Rodriguez, ug kanhi sa maong posisyon Rufos Rodriguez, Gingoog City Mayor Marie Guingona ug uban pang mga mayor sa nagkalain laing lungsod sa probinsya lakip ang mga miyembro sa partido.