NAGSILBING guest speaker si Davao City Mayor Sara Duterte atol sa oath taking sa mga barangay officials nga napili gikan sa dakbayan sa Cagayan de Oro nga gipangulohan ni Mayor Oscar Moreno.
Kini sa wala pa siya nahimo sab nga guest speaker sa mass oath taking sa mga Barangay Officials gikan sa Misamis Oriental ug pipila ka barangay sa Cagayan de Oro nga gihimo sa probinsya sa Misamis Oriental sa pagpangulo sab ni MisOr Governor Yevgeny Vincente Emano.
Sa wala pa kini mihatag sa iyang speech atubangan sa duha ka libo kapin ka mga opsiyales sa barangay lakip sa mga dagkong personalidad sa partido Padayon Pilipino iyang gisaysay iyang paghinabi kang Mayor Moreno samtang anaa siya sa Grand Caprice Restaurant kauban niini.
Kini tungod kay nasayop siya sa iyang pangutana sa mayor sa siyudad ug wala siyay kasayuran nga magkabangi diay sa pulitika si Emano ug Moreno.
"Kaganina naa man mi didto. Unsa man to ninyo sila didto? Kalaban ba to ninyo sa pikas?" Pangutana ni Inday Sara sa mitambong sulod sa Limketkai Atrium.
"Pagkadawat nako sa imbitasyon about oath taking dinhi sa CdeO ug Misamis wala ko kabalo sa inyohang klima diri sa pulitika kay ang giingon lang man gud sa akoa giimbita ko sa brother-in-law ni Sammy Uy nga amigo kaayo sa akong papa, ni Presidente Rodrigo Duterte. Ingon siya mag oath taking ug okay raman ko ug nakadawat sab ko sa imbitasyon gikan sa Emano ingon ko o sige pagkakita nako sa Emano ang ako nahuna hunaan si Mayor Dongkoy ingon ko sige-sige kon pwede usahon lang sa usa ka adlaw pag adto sa Cdeo. Ingon pod akong chief of staff nga sige mam usahon lang nato para daghan kag maagian dili masayang ang oras pag biyahe sa Cdeo." Taas nga pagsaysay ni Inday Sara.
"Kaganina paglingkod nako didto sa restaurant. Paglingkod nako didto nangutana ko kang Mayor (Moreno) Ana ko niya Mayor...kinsa diay modagan og mayor diri sa inyoha sunod tuig? Iyahang nawong ba...kay kanang...unsa maning bayhana ni. (Hahaha) Alangan naman dika makigstorya nga waman ko kahibalo... niingon dayon siya nga Aw si kuan...ako modagan man ko pagkamayor...niingon nalang ko kinsa man mokalaban nimo mayor...hahaha! Sorry wajud ko kabalo. Siyempre Mayor gud ka niingon dayon siya..aw ambot siyempre Dongkoy siguro modagan man daw to siya, modagan na pod." Pagsaysay pa niini nga samot daw gibati siya og kaulaw.
"Diyos ko Lord mali man diay ni ako pangutana Lord oi. Pagtindog ni mayor kay nag speech siya. Nangutana ko adtong nag imbita sa akoa si Kapitan Lim nga iyang asawa Uy igsuon ni Sammy Uy ug niingon ko sir...aw dili magkaaway man to sila...kana imong adtoun unya kaaway to niya." Matud ni Sara nga sulti ni Lim kaniya diin iyang pasabot si ABC President Yan Lam Lim.
Tungod kay daw inosente siya sa mga lihok sa pulitika ug mga bangi nangayo siya og pasaylo niini.
"Sorry mayor (Moreno) naay spy si Mayor diri sorry...kon mali akong pangutana nimo kaganina sa imoha nga wala nako tuyoa." Pangayo og depensa niini.
Gisaysay sab ni Mayor Sara nga iyang huna huna anaa ni kanhi Mayor Dongkoy Emano.
"Si Mayor Dongkoy kaniadto last nako nakita kadtong bagyong sendong kay naghatod mi og tabang samtang Mayor pa si PRRD. Mao to nakahuna huna ko pag-ingon Emano siya ako nadumduman ug wala ko kabalo nga dili diay sila amigo ni Mayor Moreno." Depensa ni Mayor Sara.
"Palihog ko pagpaabot ni Mayor Moreno mali ang akong pangutana kaniya." Dugang ni Inday Sara.
Sa iyang bahin ni Mayor Moreno, aminado kining wala silay nahisgotan nga kalabot sa pulitika ni Inday Sara.