TAKDO gayud usa ka tuig ang nilabay gikan gipatay ang usa ka asawa sa kaugalingon nga bana nakalotan iyang mga bukog niini niadtong June 14 sa alas 7:30 sa buntag sa Barangay 19, dakbayan sa Gingoog, Misamis Oriental.
Si Police Supirentendent Ariel Phillip Pontillas, ang hepe sa Gingoog City Police Station, niingon sa mga tigbalita nga nadiskubre ang mga bukog sa biktima nga mao si Janet Laudicos human giangkon mismo sa iyang bana nga mao si Tirso Cachepero nga iya kining nahinaykan og patay niadtong June 15 tuig 2017.
Si Cachepero usa ka wanted person sa kasong child abuse ug didto kini nadakpan sa Butuan City Police Office sa Butuan City niadtong June 13, 2018, ug atol sa custodial debriefing nga gihimo niini iyang giangkon nga iyang napatay iyang kaugalingon nga asawa pinaagi sa pagtuok gumikan sa grabeng selos ug gitultolan ang mga pulis nga iyang gilubong kini pila ka metro ang kalay-on gikan sa ilang puloy-anan sa Gingoog.
Tungod niini nakigkoordinar si Police Senior Inspector Jayeward Dulatre sa Butuan City Police Office ngadto kang Police Superintendent Pontillas aron ma-validate kon tinuod iyang pag-angkon.
Dihang giadtoan sa mga polis sa Gingoog ang dapit, didto nakita ang mga bukog sa gituohang patay’ng lawas ni Laudicos.
Matud ni Pontillas nga labihan ang hilak sa iyang mga ginikanan sa biktima gumikan kay ila diay kining gipangitaay sa dugay nga panahon apan wala lang gayud matumbok kon asa kini nagpadulong.
Sakto sab ang pagsibat ni Cachepero niaging tuig gumikan kay aduna man kini kasong giatubang nga child abuse misibat kini ug gitouhang nagtago tago sa Butuan City. Madugangan na usab ang kasong atubangon niini karong panahona.
Sa pagsulat ning balita giandam na ang pormal nga lubong alang sa namatayng biktima. (SVB)