GIHILAM sa usa ka ulitawo ang pribadong parte sa lawas sa dalaga mga alas 7:45 sa gabii niadtong milabay nga adlaw, Hunyo 16, 2018, samtang anaa sa dalang Cruz-Taal, dakbayan sa Cagayan de Oro.
Nidangop sa kapulisan ang biktima nga si Jennie (bansagon gitago), 21, kinsa residente sa Barangay Tablon ning siyudad samtang ang gireklamo usa ka ulitawo nga kasamtangang nagpuyo sulod mismo sa usa ka tunghaan ug gituohang trabahante sa mismong eskwelahan.
Sa nahipos nga impormasiyon, giingong samtang anaa sa nahisgutang dapit ang biktima kalit lamang nga niduol ang usa ka lalaki ug gihilam ang pribadong parte sa maong dalaga hinungdan nga gibati kini og kaulawon lakip na kabalaka.
Gikabutyag nga dako na lamang ang kakurat niini sa gihimo sa suspek sa wala’y igong rason.
Nasayran nga dili lamang kini ang unang higayon nga aduna’y biktima ang nagpatala sa buhatan sa kapolisan sa susama niini nga panghitabo diin kalit lamang nga hilamon ang pribadong parte sa lawas sa babaye.
Sa pagsulat niini nga balita, ang insidente ang nakatala na sa buhatan sa kapolisan sa Police Station 1 sa Divisoria ug padayon pa ang imbestigasiyon sa maong kaso.