PATAY ang usa ka lalaki human nga na-aksidente niadtong Hunyo 17, 2018, sa NHA, Barangay Kauswagan, dakbayan sa Cagayan de Oro.
Naila ang namatay nga si Alvin Jay Pamisa nga taga Bulua ning dakbayan samtang angol usab ang angkas nga ig-agaw sa biktima nga si Christian Llames.
Sa nahipos nga inpormasiyon, gikabutyag nga samtang gibaybay sa mga biktima ang kadalanan sakay sa motorsiklo nga gimaneho ni Pamisa diha sa maong dapit, aksidente nilang nasugat ang usa ka pribadong sakyanan hinungdan sa head-on nga panagbangga.
Gi-angkon ni Llames anaa kini sila sa impluwensiya sa ilimnong makahubog ug kusog-kusog ang ilang dagan.
Gidugang pa niini nga ni-overtake si Pamisa sa laing sakyanan ug aksidenteng nakasugat ang Ford ranger hinungdan sa aksidente.
Maayong pagkalagpot sa duha apan wala’y swerteng patay diha dayon si Pamisa human sa maong pagkabangga.
Nakaangkon usab si Llames og samad sa nagkadaiyang parte sa kalawasan lakip iyang tuhod.
Sa pagkakaron, ang patay nga lawas ang gi-atiman na sa nahabilin pamilya.