DINAPIT nga bisita si Davao City Mayor Sara Duterte-Carpio nga nahimong mamumulong sa mass oath taking nga gipahigayon sa mga napiling barangay officials gikan sa nagkadaiyang lungsod sa lalawigan sa Misamis Oriental ug dakbayan sa Cagayan de Oro.
Ang oath taking gipangunahan mismo ni Governor Bambi Emano nga gitambongan sab sa mga haligi sa partido PaDayon Pilipino niadtong Biyernes, Hunyo 15 sa Atrium, Limketkai Center, Lapasan, dakbayan sa Cagayan de Oro.
Si Mayor Sara nihatag og mensahe ug mga tips ngadto sa 2,150 ka mga opisyales aron mahimong epektibo nga mga public servant sa ilang tagsa-tagsa ka barangay.
Matud sa mayora, kinsa tsirman sab sa partido sa Hukbong ng Pagbabago, nga unang buhaton sa mga opisyal magplano sa ilang himuon nga proyekto aron dili magkalisod sa pagpangita og pundo.
Gipasabot ni Mayor Sara nga ang proyekto nga gihimo karon nga tuig gibudgetan na niagi pang tuig.
"Ang project nato karon nga giimplement ang budget ana ginabuhat the year before. Ang gigamit nato karon gibuhat nato adtong 2017, kung walay supplemental budget maglisod pagkomit ang Mayor, ang Congressman ug ang Governor sa inyong proyekto." Matud ni Mayor Sara ug nipasabot nga gikinanglan nga ang buhaton sa unang tuig sa pagserbisyo mao gyod ang pagplano.
"Mas maayo inyong buhaton is magplano sa first year para sa second year, para sa third year. Apila nalang pod og plano para sa fourth ug fifth year kay basin diay wala napod barangay election." Pahiyom nga mensahe niini.
"Para man gud dili mo magsige gukod sa pagpangita og budget, source of fund para duna moy target para karon tuig mao ni amo mga project nga ipakita sa mga tao para ma-manage ang expectation sa mga tao. Bahala na you do not give them the sun the moon and the stars basta niingon ka kini na project karon tuiga mabuhat ug madeliver ninyo sa inyong barangay. It will be very good nga magplano mo daan. Aron sab makapadala namo sa unsa ang kailangan nga budgetan sa LGU ug sa probinsya."
Butyag sab niini nga nasayod siya nga ang election dako og gasto apan dili kini angayan ikabalaka kon ang pagserbisyo tinud-anay.
"Para dili dako inyong budget pampalit og buto karong July 1 sa day 1 palang mao na pinaka unang adlaw nga nangampanya mo. Mangampanya namo para sa sunod eleksyon. So tanan nga mga activity nga kinahanglan buhaton para sa inyong barangay inyo na buhaton karon aron madumduman mo. Karon daan manuktok namo panahon sa pista. Ayaw ninyo kalimte ha nikaon ko sa inyoha. Ayaw sab palabya ang mga microphone ug inyong isulti inyong pasalamat sa ilang gihatag nga suporta ug magpahinumdom mo daan nga inyong gikinahanglan ilang suporta sa sunod nga eleksyon." Pasabot niini ug midugang nga dili gyod magkalisod sa pagkuha og suporta kon tarong ang pagserbisyo sa katawhan.
"Kung three years motrabaho mo og tarong ug magprudyos mo og good public service dili na ninyo problemahon ang gastos sa kwarta sa eleksyon." Butyag niini.