KAPIN sa 350 ka mga tinun-an gikan sa duha ka mga publikong tulunghaan sa elementarya sa bukirang Duangan, Pinamungahan nananom og 3,500 ka mga kahoy ni’ng bag-o pa lang.
Nangulo si Kapitan Annette Navarro sa mga kauban niya sa konseho ug mga magtutudlo sa Duangan Elementary School ug Guimbawian Elementary School nga miuban sa kabataan sa pagpananom.
Lakip sa ilang mga natanom ang Acacia, Acacia Auri, Caimito, Lanutan, Lomboy, Mahogany, Molave, Narra ug Tagilomboy, matod ni Mitzie Almira I. Carin, usa sa mga nagdumala sa Solid Earth Development Corp. (SEDC) nga mihatag sa mga linuyong.
Gipasiugda sa SEDC ang pagpananom, nga pagasundan pa og pipila nga susamang kalihukan, agi og pasiuna sa pagmina na unya nila’g mga materyales alang sa paghimo’g semento sa planta sa Taiheiyo Cement Philippines, Inc. (TCPI).
Gipasabot una ang mga tinun-an sa elementarya sa kabililhon sa pagpananom og mga kahoy nga ilang gibuhat pagkahuman sa kabukiran sa Pinamungahan uban sa ilang mga pamilya ug mga magtutudlo. Nakapahigayon sab kini og pipila na ka mga medical mission alang sa mga kasilinganang lumolupyo sukad pa sa tuig 2013.
Sa milabay nga 10 ka tuig, nakapananom na ang SEDC uban sa TCPI ug kapin na sa 65 mil ka mga kahoy sa mga silingang barangay sa Bugho, Cabatbatan ug Magsico sa San Fernando asa kini nakamina na ug mipahiuli sa mga kanhi minahan. (PR)