Dear Noy Kulas,
Ako si Dave. Naa koy crush nga usa ka tomboy. Classmate mi og duha na ka tuig sa college ug close friends mi.
Tomboy siya, Noy Kulas, pero di halata kay gwapa kaayo ug puti, taas og buhok ug babaye og lihok. Di siya mailhan. Sa school, mapansin siya tungod sa iyang physical appearance nga nindot kaayo. Sa sige namong kuyog, na-develop ang akong feeling niya. Nagkadugay, nagkadako ang akong feeling para niya.
Naa siyay uyab nga babaye ug di malikayan, magselos ko. Unsa kaha akong buhaton, Noy? Kay magsige mi og kuyog ug naa ang iyang uyab. Hot ra ba ni siya, magsige sila og kiss in front nako. Kinsay di malain?
Maayo kaha nga ako na lang ni siyang likayan? Gisuwayan nako og likay pero di makaya. Mingawon kaayo ko niya. Or ako na lang kaha siyang sultihan? Di kaha siya malain?
DAVE
Dave,
Kon magpahakop ka sa kahadlok, di mo masuwayan kon naa ka bay chance o di bisan lakin-on siya. Pilay palad, sugton diay ka niya o kaha maghuna-huna siya nga bisan sa iyang kahimtang, dunay lalake nga dunay pagbati niya. Pagbati na nga di tingali kaibog kay nahitabo ni samtang nagsige mo og kuyog.
Di man gani ka niya sugton ug masuko siya, let it be. Kay wa bayay kasuko nga maglungtad labina kon gugma na ang hisgutan. Di usab angay ikasuko kon ikaw nahigugma niya kay bisan tuod lalake ang iyang pagbati, physically babaye man usab siya samtang ikaw lalake. Natural usab na nga mahitabo.
Naa may mga sama niya nga nangaminyo gani, nakabaton og anak bisan kon sila naay pagbati nga lalake.
Kon di na siya ganahan makigkuyog nimo, pasagdi, dawata. Ang importante nga nakapadayag ka sa imong pagbati ngadto kaniya kay sa nagpabilin kang nagpakahilom, nag-antos sa pagpakig-uban kaniya samtang loving kaayo sila sa iyang uyab.
NOY KULAS
(Alang sa imong problema, e-mail sa kulassuper@sunstar.com.ph ug rojval69@yahoo.com)