LINGAW gihapon ang Jurassic World: The Fallen Kingdom. Kon wa ko masayup, mao ni ikalimang pelikula sa Jurassic.
Sukad sa unang Jurassic Park niadtong 1993, wa gyud koy palta. Moangkon ko nga nahimo na kong fan aning salidaha.
Ang nakabag-o karon sa The Fallen Kingdom kay dunay bulkan nga niboto. Daghang lava ang nibuga ug nikamang nga nagbutang sa peligro sa mga dinosaur nga mahurot sila og kamatay.
Mas daghan sad ron ang dinosaur kon itandi sa mga naunang Jurassic. Ug kon sa una naa sila sa Isla Nublar, karon naa sa sulod sa dakong mansion nahitabo ang ilang kombati.
Duna say bag-ong napuno sa cast nga importante ang papel, ang batang si Maise nga gidala sa bag-ong child star nga si Isabella Sermon.
Si Masie ang intelihenteng apo sa tag-iya sa mansion nga si Sir Benjamin Lockwood (James Cromwell), kinsa usa sa mga nagmugna niadto sa Jurassic Park.
Bida gihapon dinhi silang Claire Dearing (Bryce Dallas Howard), ang kanhi Jurassic World operations manager nga nahimong dinosaur activist ug si Owen Grady (Chris Pratt), ang handler sa mga dinosaur ug nagpadako ni Blue, ang katapusang Velociraptor.
Tugob gihapon sa aksyon ug kulbahinam ang The Fallen Kingdom nga unang gidirek niadto ni Steven Spielberg.
Bisan wa mo kakita sa miaging mga episode sa Jurassic, apan dili ra lisud sabton ang estorya The Fallen Kingdom.
Inig gawas nimo sa sinehan, siguradong magbilin gihapon ni og igong kahinam ug kadasig aron hangpon ang sunod pang mga sumpay sa Jurassic World.
Akong grado from 1 to 10... is 8.5.
Nitibugsok
Sa pagkawala sa AlDub, grabe ang pagtibugsok sa rating sa Eat Bulaga. Kay kon sa una, sila ang hari sa daytime shows, karon wala na gani sila manimaho sa Top 10.
Ang It’s Showtime maoy pirme karon naa sa Top 3 sa daytime programs sa nationwide rating.
Sa primetime, ang bugtong teleserye sa GMA nga nakasud sa Top 10 sa nationwide rating ang Kambal Karibal (Bianca Umali), The Cure (Jennylyn Mercado ug Tom Rodriguez) ug ang Inday Will Always Love You (Barbie Forteza). Ang tanan puros na gidominar sa ABS-CBN.